Soedarma K.D.

Soedarma K.D. ya iku sastrawan saka Jawa. Soedarma lair ing Ngawen, Wonosari, Yogyakarta, tanggal 31 Juli 1934. Jeneng mburiné, K.D., ya iku singkatan saka jeneng bapaké Soedarma, Slamet Karto Dwijo sing lair ing Ngawen taun 1911. Bapaké ya iku guru SD lan jabatané sing pungkasan ya iku dadi kepala SD Ngawen. Ibu Soedarma jenengé Suripni lan lair ing Wonogiri taun 1915^[1].

Soedarma rabi karo Suwarsini, guru SD (1957). Saka palakrama iki, dhèwèké nduwé anak enem, ananging anak sing katelu lan kaenem wis kapundhut déning Gusti. Sing papat liyane isih meger-meger ya iku: (1) Herlinari Derita, lair 7 Mèi 1958, Sarjana Fakultas Sosial Politik UNS lan nyambut gawé ana ing Dinas Pendapatan Daerah Rembang; (2) Lila Lumaris, lair 28 Maret 1960, lulusan Diploma I AKS lan dadi guru ing SMA ana Magelang; (3) Fani Nurlian, lair 11 Oktober 1962, sarjana Fakultas Hukum Universitas Kristen Indonésia, Jakarta, lan nyambut gawé ing Departemen Pendidikan Nasional Jakarta; (4) Lita Lalita, lair 1964 , sarjana STIK Semarang, ibu rumah tangga.^[1].

Pendhidhikan

Soedarma ngawali sekolahé ing SR Ngawen, Gunung Kidul, Yogyakarta, lulus 1951. Banjur, lanjut sekolah menyang SGB Kristen Salatiga, lulus 1953 lan lanjut menyang SGA Kristen Surakarta, lulus 1956. Tamat SGA, banjur lanjut kuliah ing Pendidikan Guru Sekolah Lanjutan Tingkat Pertama (PGSLP), Jurusan Basa Indonésia lan lulus taun 1967.

Soedarma gedhé ana ing kulawarga guru, amarga kuwi Soedarmo lan enem tunggalé dadi guru. Taun 1956, dhèké diangkat dadi guru SD Kemalang, banjur dadi Kepala SD Jumbung II lan ngrangkep guru SD Jimbung I (1958). Saliyané kuwi, Soedarma nyambi ngajar ing SLTP Negeri Bayat I, Klathèn, Jawa Tengah.

Karya

Awit cilik, Soedarma kerep ndelok bapaké seneng nulis lan ngarang cerita. Salah siji karyané bapaké Soedarma ya iku crita bocah sing dibabar déning Balai Pustaka, Jakarta. Pakulinan iki banjur nurun menyang Soedarma. Nalika sekolah nang SGB, Soedarmo uwis wiwit nulis crita bocah sing dimot ing majalah Kemuning (1953). Nalika kelas I SGA (1954), Soedarmo wiwit ngarang lan ngirim karya menyang majalah Waspada, Penjebar Semangat, Kekasihku, Mekar Sari, Jaya Baya, Dharma Nyata, lan Dharma Kanda. Amarga kerep nulis, Soedarmo diangkat dadi staf redaksi ing sawenèh kantor majalah. Dhèwèké miwah dadi pengasuh rubrik Gupitasari ing majalah Mekar Sari. Saliyané iku, miwah pengasuh ing "Rubrik Pengarang" sing akèh ngulas karya-karya pengarang Sastra Jawa Modhèren. Salah sawijining cerkaké "Nglari Endah Swasana" dilebokaké ing antologi déning Senggono ing Kumandang (1958).

Kreativitasé Soedarma saya mundhak sawisé rabi lan nulis luwih akèh novèl (saku), crita cekak, crita bocah, lan ésai. Saliyané iku, Soedarma miwah diundang ceramah ing akeh patemonan. Bab iki nuduhaké menawa Soedarma pantes dikenal déning wong-wong sing seneng basa lan sastra Jawa.

Rujukan

↑ ^a ^b Widati, Sri; Prabowo, Dhanu Priyo; Rahayu, Prapti (2015). Ensiklopedi Sastra Jawa. Yogyakarta: Balai Bahasa Yogyakarta. kc. 479–450. ISBN 9789791852357.

[:0-1] Widati, Sri; Prabowo, Dhanu Priyo; Rahayu, Prapti (2015). Ensiklopedi Sastra Jawa. Yogyakarta: Balai Bahasa Yogyakarta. kc. 479–450. ISBN 9789791852357.

[1]