Rénda bangku
Rénda bangku iku cara kanggo ngrénda utawa nenun kang asalé saka Palémbang.[1] Diarani rénda bangku amarga cara iki nganggo dudukan utawa landhesan wujud bantal separo bunderan kang duwé sikil papat. J.E. Jasper lan Mas Pirngadi ngarani rénda iki rénda Palémbang amarga saka panlitèné cara iki kang sepisanan dienggo ing Palémbang. Kira-kira ing awal abad 20, ngrénda dadi kagiyatan kang misuwur ing Palémbang, banjur nyebar lan ngrembaka ing dhaerah liyané ing Sumatra. Ora mung Sumatra, ing tembé ngrénda uga ngrembaka nganti tekan Jawa. Pagawéan ngrénda sajatiné wis akèh ditandangi marang wong ing sadonya, kaya ta Jerman, Walanda, Irlandia, Skandinavia lan Ruslan.[2]