Madakaripura

Saka Wikipédia Jawa, bauwarna mardika basa Jawa
Menyang navigasi Menyang panggolèkan

Miturut Nāgarakṛtâgama, Madakaripura iku jeneng sima (laladan pardikan) darbéné Gajah Mada. Laladan pardikan iku diwènèhaké Gajah Mada déning Hayam Wuruk kang nalika iku lungguh kaprabon ing Majapait. Hayam Wuruk dinuga wèwèh sima iku sabubaré lelakon Perang Bubat. Laladan mau sinebut minangka papané Gajah Mada sesanggrah. Ing Pararaton Gajah Mada sinebut undur saka kalungguhané sabubaré Perang Bubat saperlu mukti palapa, kang tinegesan 'lèrèn saka kadonyan'. Unèn-unèn mukti palapa ing babagan iku béda saka unèn-unèn sairib, amukti palapa, kang kondhang lan tinegesan Sumpah Palapa. Sumpah Palapa dhéwé kalakon ing mangsa sadurungé nalika ibuning Hayam Wuruk, Tribhuwanottunggadewi, lungguh kaprabon. Ing lelakoné menyang Lumajang nalika taun 1359 M, Hayam Wuruk sinebut tau mampir ing Madakaripura.[1]

Pernah saiki[besut | besut sumber]

Ora ana kang weruh pernahé Madakaripura kang temen. Mangkonoa, pernahé dinuga ana ing Jawa Wétan.[1] Kang lumrah wong pracaya yèn pernahé ana ing Kacamatan Tongas, Prabalingga, Jawa Wétan. Panemu iku dhedhasar ing jeneng mandhala mambulu traya (19:Id) kang sinebut ing Nāgarakṛtâgama lan ditapsiri minangka Désa Ambulu saiki kang kapernah ing kacamatan mau.[butuh sitiran]

A. Gomperts ndeduga Dhusun Dhadhapan ing Désa Grogol, Kacamatan Gondhang Wetan, Kabupatèn Pasuruan minangka papan kang dimaksud ing Nāgarakṛtâgama.[butuh sitiran] Dhedhasar panduga mau, njedhul panduga liya yèn Madakaripura kapernah ing Kabupatèn Pasuruan, antaraing Désa Grogol lan Désa Winongan[butuh sitiran] kang saiki kapérang dadi Désa Winongan Lor lan Désa Winongan Kidul.

Réferènsi[besut | besut sumber]

  1. a b Munandar (2008), kk. 3-4.

Pratélan pustaka[besut | besut sumber]

  • Gomperts, A., "In the Footsteps of Hayam Wuruk", IIAS Newsletter No. 39, Leiden, 2005
  • Hadi Sidomulyo, Napak Tilas Perjalanan Mpu Prapañca, Wedatama Widya Sastra, Jakarta, 2007, ISBN 978-979-3258-69-0
  • Munandar, Agus Aris (2008). Ibukota Majapahit, Masa Jaya dan Pencapaian (PDF). Komunitas Bambu. ISBN 979-3731-39-7. OCLC 968320880.