Hyakunin Isshu

Saka Wikipédia Jawa, bauwarna bébas abasa Jawa
Karuta mawi seratan syair kapisan saking Hyakunin Isshu, (Aki no ta no Kariho no io no Toma o arami)

Hyakunin Isshu (百人一首?) inggih punika antologi puisi klasik kanthi isi 100 syair saking 100 penyair Jepang. Sanajan rumiyinipun punika wonten sapérangan "Hyakunin Isshu" ingkang sanès, Hyakunin Isshu padatanipun sapunika tumuju dhateng Ogura Hyakunin Isshu ingkang dipunsusun déning Fujiwara Teika.

Ogura Hyakunin Isshu punika dipunsusun déning penyair Fujiwara Teika nalika ing zaman Kamakura.[1] Puisi ingkang dipunkempalaken punika asalipun saking 100 tiyang penyair waka kondhang ingkang sampun kawiwitan damel karya punika saking zaman Kaisar Tenchi dumugi ing zaman Kaisar Juntoku. Wonten ing antologi puisi punika, puisi kasebut dipunsusun kanthi kronologis saking puisi ingkang paling sepuh dumugi ing puisi ingkang paling enggal. Murid Fujiwara Teika ingkang kagungan nama Utsunomiya Renshō (Utsunomiya Yoritsuna) damel aliran seni waka ingkang dipunwastani Utsunomiya Kadan (宇都宮歌壇?). Nalika madegaken griya kanggé ngaso (rumah peristirahatan) Ogura wonten ing Sagano, Kyoto, piyambakipun nyuwun dhateng Fujiwara Teika supados milih pundi waka ingkang paling saé saking penyair ingkang kondhang kasebut lajeng dipunserat wonten ing sanginggilipun kertas shikishi. Utsunomiya Renshō gadhah kekajengan kanggé nèmpèlaken kertas-kertas ingkang mawi isi waka ingkang dados pilihanipun Fujiwara Teika wonten ing fusuma ing vila ingkang kala punika nembé dipunbangun. Kertas-kertas mawi isi waka ingkang dipunserat déning Fujiwara Teika kasebut kalebet wujud wiwitan saking Ogura Hyakunin Isshu [2]. Saking 100 penyair ingkang piyambakipun pilih wonten 79 penyair kakung (15 ing antawisipun biksu) lan ugi 21 penyair èstri. Nalika bibar kapungkasan anggènipun dipunsusun, antologi puisi punika boten gadhah irah-irahan kanthi resmi. Awit saking punika asring dipuntepangi mawi irah-irahan ingkang bènten-bènten kadosta Ogura Sansō Shikishi Waka (Waka saking Shikishi wonten ing Vila Ogura) utawi dipunsebat Saga Sansō Shikishi Waka (Waka saking Shikishi wonten ing Vila Saga).

Sumber kanggé Hyakunin Isshu inggih punika Kokin Wakashū lan Shin Kokin Wakashū.[1] Kejawi minangka antologi puisi, Hyakunin Isshu dipunginakaken minangka buku pengantar déning tiyang ingkang gadhah kekajengan kanggé sinau nyerat utawi nyinaoni waka. Bibar majuning teknik panyithakan mawi tèknik cukil kayu ing masa zaman Edo, Hyakunin Isshu terbit minangka karuta lajeng kondhang wonten ing kalangan rakyat Jepang minangka dolanan uta garuta.

Cathetan suku[besut | besut sumber]

  1. ^ a b "Hyakunin isshu to wa (百人一首とは)". 
  2. ^ (id) Halo Okaya, (dipunakses tanggal 25 Februari 2013)

Pranala njawi[besut | besut sumber]

Commons-logo.svg
Wikimedia Commons gadhah galeri bab:
Sumber artikel punika saking kaca situs web: "https://jv.wikipedia.org/w/index.php?title=Hyakunin_Isshu&oldid=997648"