Grafem

Saka Wikipédia Jawa, bauwarna bébas abasa Jawa

Ing babagan linguistik, grafem iku unit paling cilik sajeroning aksara sing dianggo ing sawiji basa.[1] Sawiji grafem ora kudu ngemu surasa lan ora kudu gathuk karo fonem, sing dianggo tumrap basa caturan. Grafem nglimputi huruf-huruf ing alfabèt, ligatur-ligatur ing tipografi, karakter-karakter Cina, dhigit-dhigit wilangan, tandha-tandha waca, lan simbol-simbol liyané.

Tembung grafem ing basa Jawa iku serapan saka tembung Inggris grapheme. Tembung grapheme mono tumurun saka tembung Yunani γράφω (gráphō), tegesé "nulis" lan ater-ater -eme. Tembung iki digawé lumantar analogi karo tembung phoneme (fonem) lan istilah-istilah liya sing kalebu ing unit em. Kajian bab grafem ingaran grafemik.

Grafem iku gantha abstrak kaya ta karakter sing uga gantha abstrak ing babagan komputasi. Sawaliké, wangun sing nglambangaké grafem ing sawiji rupa huruf iku aran glif. Contoné, grafem sing ngandhut gantha abstrak "wilangan Arab siji" duwé rong glif sing béda (alograf) sajeroning fon Times New Roman lan Helvetica.

Pratélan tetembungan[besut | besut sumber]

Ana ing ngisor iki tembung-tembung Jawa sing dianggo ing artikel iki, dikanthèni jarwané ing basa Indonésia lan Inggris.

  1. aksara - writing system
  2. basa caturan - spoken language
  3. fon - font
  4. gantha - concept
  5. rupa huruf - typeface
  6. surasa - meaning
  7. tumurun - derive
  8. wangun - shape
  9. wilangan - numeral

Rujukan[besut | besut sumber]

  1. ^ Coulmas, F. (1996), The Blackwell's Encyclopedia of Writing Systems, Oxford: Blackwells, p.174