Christiaan Snouck Hurgronje

Snouck Hurgronje

Snouk Hurgronje utawa Christiaan Snouck Hurgronje (1857-1936) lair tanggal 8 Fèbruari 1857 ing Tholen, Oosterhout, Walanda. Kaya bapak, embah, lan embah buyuté kang betah dadi pandhita Protèstan, Snouck nalika wiwit cilik wis diarahaké ing babagan teologi. Tamat sekolah menengah, dhèwèké nerusaké menyang Universitas Leiden njupuk mata kuliah Ilmu Teologi lan Sastra Arab, 1875. Limang taun sabanjuré, dhèwèké tamat kanthi predhikat cum laude kanthi disertasi Het Mekaansche Feest (Pahargyan ing Mekah). Ora cukup marem marang kaprigelan basa Arabé, Snouck banjur nerusaké sinau menyang Mekah, 1884. Ing Mekah, grapyak lan naluri intelektualé agawé para ulama ora wegah mbimbing. Lan kanggo milut atiné ulama Mekah, Snouck lumebu agama Islam lan salin jeneng dadi Abdul Ghaffar.

Nanging, patemon Snouck karo Habib Abdurrachman Az-Zahir (keturunan Arab kang naté dadi wakil pamaréntah Acèh, banjur "dituku" Walanda lan dikirim ana ing Mekah) ngowahi kekarepané. Kanthi pambiyantu Zahir lan konsul Walanda ing Jeddah JA Kruyt, dhèwèké wiwit sinau pulitik kolonial lan ngupaya supaya bisa menang yuda ing Acèh. Éman, iguh-pratikelé Zahir ora ditanggepi Gubernur Walanda ing Nusantara. Amarga gela, kabèh panalitèn Zahir iku kapasrahaké marang Snouck kang nalika iku, 1886, dadi dosèn ing Leiden.

Ing jagad akadhemik Indonèsia Snouck Hurgronje kinawruhan minangka intelijen kang mumpuni rikala jamané. Dhèwèké kasil ngimpun pirang-pirang buku lan laporan kang manéka warna kang migunani tumrap panalitèn ing Indonèsia.