Anti-Paus Felix II

Saka Wikipédia Jawa, bauwarna bébas abasa Jawa

Felix II punika Anti-Paus wiwit taun 356 dumugi taun 358.

Nalika taun 356, panjenenganipun dipunangkat dhumateng tahta Kapausan nalika Paus Liberius dipunbucal déning Kaisar Romawi Konstantius II amargi nulak napakastani serat pangutukan dhumateng Athanasius. Pamilihan Felix matentangan kaliyan pepénginan para klerus lan masarakat wiyar. Panahbisan Felix dipunlampahaken déning sapérangan pendhéta inggil ingkang dipungadhahi déning istana. Nalika kapilih, panjenenganipun nembé njabat minangka dhiakon agung Roma.

Nalika taun 357, amargi panyuwunan ndhesak saking utusan pawèstri-pawèstri bangsawan Romawi, Konstantius nyarujuki kanggé mbébasaken Liberius, kanthi sarat panjenenganipun kedah napakastani pranyatan iman sèmi-Arian. Konstantius ugi ngedalaken satunggiling dhekrit bilih Felix ugi Liberius kedah mréntah sacara sesarengan. Senadyan mekaten, kunduripun Liberius dhumateng Roma nalika taun salajengipun dipuntampi déning sadaya lapisan kanthi antusias sanget. Pupunika nyebabaken Felix mutusaken kanggé énggal-énggal munduraken dhiri saking Roma.

Namung sekedhik ingkang dipunkawruhi perkawis sisa gesangipun. Cathetan-cathetan perkawis piyambakipun kathah ingkang silih kontradhiksi, nanging ketingalipun panjenenganipun nelasaken sisa wekdalipun ing tanah kagunganipun ing caket Porto. Panjenenganipun séda nalika taun 365 lan (tanpa dipunkawruhi dhasaripun) dipunanggep minangka martir, ingkang dipunpèngeti saben tanggal 22 Juli. Nalika mangsa kapausan Paus Gregorius XIII, pamanggènan nami Felix II ing antawisipun dhaftar Paus dipunrembagaken. Kanggé mbiyantu mutusaken, dipunupados punapa wonten kaajaiban ingkang saged dipunpanggihaken perkawis Feliks. Sarkofagusipun dipunbikak, lan miturut legendha, tembung "Paus lan Martir" dipunpanggihaken kaserat ing badanipun. Nanging, legendha supernatural punika boten dipunakeni déning otoritas Gréja Katulik Roma.

Pranala njawi[besut | besut sumber]