Anggar

Anggar iku seni budaya ulah raga katangkasan mawa gaman sing mbutuhaké tèknik kamampuan kaya déné motong, nyuduk utawa nangkis gaman lawan kanthi migunakaké katrampilan tangan. Ulah raga anggar dumadi saka telung jinis gaman, ya iku epee, foil lan sabre. Saben gaman mau duwé sipat lan aturan dhéwé-dhéwé.

Ètimologi tembung "anggar" asalé saka Basa Prancis "en garde", pocapané ing Basa Indonesia dadi "ang-gar" sing tegesé "siyap-siyap". Tembung "en garde" dipigunakaké sadurungé permainan anggar diwiwiti, kanggo mènèhi aba-aba "siyap" marang para juru main.