Amplop

Saka Wikipédia Jawa, bauwarna mardika basa Jawa
Amplop Surat

Amplop yaiku bungkus saka layang utawa barang kang dikirim liwat kantor pos. Amplop lumrahé digawé saka dluwang kang dikethok lan diwangun kaya belah ketupat. Kertas mau banjur ditekuk lan dilèm nganti kaya wujud amplop.[1] Ing pérangan ngarep amplop ing pérangan tengen ngisor, jeneng lan alamat kang nampa kiriman pos iki ditulis.[1] Ing pérangan tengen dhuwur utawa ing pérangan mburi kanggo nulis jeneng lan alamat kang ngirim layang.[1] Amplop bisa langsung ditutup awit lumrahé amplop dilèm supaya raket lan ora kena dibukak manèh saliyané karo sing nampa.[1] Amplop duwèni akèh ukuran.[1] Amlop ana kang duwé kaya cendhéla saéngga jeneng lan alamat kang nampa bisa ditulis ing pérangan jero surat.[1]

Saiki amplop ora mung kanggo mbungkus surat nanging uga kanggo mbungkus barang lan dhuwit.[1] Amplop kang ukurané gedhé lumrahé kanggo wadhah kertas kaya ta dhokumèn, sertifikat, makalah.[1]

Étimologi[besut | besut sumber]

Tembung amplop kalebu tembung serapan kang asalé saka basa Walanda yaiku envelop.[1] Ing basa Walanda iki uga kalebu tembung serapan saka basa Prancis yaiku envelope kang uniné dilafalaké /ɑ̃.və.lɔp/.[1] Tembung iki ing basa Prancis kalebu tembung turunan saka tembung kriya envelopper kang tegesé mbungkus.[1]

Tembung amplop uga nduwé teges konotasi yaiku dhuwit sogokan.[2] Kang dadi fokusé yaiku dhuwit kang ana ing jero amplop nanging lumrahé diarani amlop kanggo kiasan utawa ing basa Indonesia diarani amplop pelicin yaiku amplop kang isiné dhuwit kanggo nggampangaké utawa nglancaraké proyek.[2]

Cathetan suku[besut | besut sumber]

  1. a b c d e f g h i j k artikata.com(dipunundhuh tanggal 17 Juni 2011)
  2. a b nasional.kompas.com(dipunundhuh tanggal 17 Juni 2011)