Album

Saka Wikipédia Jawa, bauwarna mardika basa Jawa

Album utawa jangkepé album rekaman iku kolèksi audio utawa musik sing didhistribusi kanggo publik. Cara paling umum yaiku liwat dhistribusi niaga, sanadyan kerep uga didhistribusi langsung ing siji konsèr utawa liwat situs wèb. Lumrahé, siji rerangkèn lagu dianggep album yèn duwé susunan pratélan lagu sing konsisten, kadhangkala kanthi prabédan cilik utawa lagu tambahan ing sawatara laladan, utawa yèn album mau dirilis manêh ing wektu liya.

Lagu ing siji album bisa duwé subyèk, swasana, utawa swara sing mèmper, utawa malah dirancang kanggo mratélakaké siji pesen utawa nélakaké sawiji carita (contoné ing album konsèp), utawa bisa uga mung nggambaraké sawiji panglompokan rekaman sing digawé ing siji wektu utawa panggonan, utawa rekaman-rekaman sing hak komersialé diatur déning siji label rekaman tinamtu.