Pasisir Sigandu

Tambah pranala
Saka Wikipédia Jawa, bauwarna mardika basa Jawa
Aksara Latin
      

Pasisir Sigandu inggih menika salah satunggaling pariwisata ingkang mapan wonten ing Dhusun Klidang Lor, Kecamatan Batang, Kabupatèn Batang, Jawa Tengah. Pasisir Sigandu kagolong pasisir ingkang radi mayat kanthi ombak ingkang boten radi inggil. Tebihipun saking Alun-alun Kabupatèn Batang mawi antara 4 kilomèter utawi kirang langkung 15 menit. Pasisir menika gadhah wedhi saha pasawangan ingkang éndah ugi wonten kafé saha wandé tradhisional ingkang tumawar kathah dhaharan ingkang khas, kados ta sekul megana kanthi lawuh gimbal rebon.[1][2][3]

Pasisir Sigandu gadhah garit pasir ingkang panjang kanthi wiyaring wedhi kang gumelar. Boten kathah uwuh ingkang saged katingal amargi wonten padamel karesikan ingkang tansah reresik wonten ing pasisir menika. Sapanjang tepining pasisir kirang langkung 100 mèter saking segara, wonten kathah uwit-uwitan ingkang rembuyung saha rapi. Uwit-uwitan menika asring dipun-ginakaken para wisatawan kanggé ngaub saking bentèring surya nalika siyang, sinambi rumaos iliring angin pasisir.[4]

Pariwisata[besut | besut sumber]

Pasisir Sigandu gadhah aréa wedhi ingkang wiyar sanget, saéngga saged dipun-ginakaken para wisatawan kanggé kathah palampahan. Pangalola pariwisata sampun nyumawisaken kathah fasilitas, kados ta pit motor ATV (All Terrain Vehicle) ugi papan kanggé ulahraga arupa voli pasisir. Kajawi menika, Pasisir Sigandu ugi dados salah satunggal papan ingkang langkung saé menawi badhe ningali sereping surya wonten ing Batang.[5] Pasisir Sigandu gadhah wana tanjang branggah ingkang boten namung dipun-ginakaken kanggé njagi abrasi segara, nanging ugi dipun-ginakaken dados papan pariwisata.[6]

Pasisir Sigandu ugi kawentar kanthi ombak ingkang boten radi inggil, saéngga papan pariwisata menika saged dipundadosaken papan wisata kaluwarga.[5] Para wisatawan saged nyobi nglangi wonten ing segaraning Pasisir Sigandu, ananging sampun ngantos tebih saking pasir supados boten kalampah kadadosan ingkang awon. Limrahipun wonten garit wates kanggé watesing nglangi.[4]

Menawi anglih, para wisatawan saged mampir dhateng kafé-kafé ugi résto utawi wandé dhaharan ingkang sumebar wonten tepining Pasisir Sigandu. Pasisir Sigandu ugi wonten Batang Dolphin Center (BDC). BDC inggih menika satunggal papan ingkang dipun-ginakaken kanggé konsèrvasi lumba-lumba. Papan konsèrvasi menika mangéka karya kaliyan Taman Safari Indhonésia saha Badan Konsèrvasi Sumber Daya Alam supados saged ngajengaken atraksi lumba-lumba ingkang nges.[6] Ananging atraksi lumba-lumba namung kalampahan kadhangkala. Wonten ing BDC ugi wonten akuarium ulam, blumbang kurma, sarta kebon sato alit kanthi kathah kolèksi sato kéwan, kados ta sima tutul, bruwang maben, sebra, waterbug, llama, peksi èmu, lan sapanunggalanipun.[4]

Wonten ing Pasisir Sigandu ugi wonten dermaga alit kangge papan palabuhaning kapal-kapal wisata ingkang saged dipun-ginakaken déning para wisatawan menawi badhé mlampah-mlampah wonten segara. Menawi badhé misaya mina ugi sampun kacumawis paséwan pirantos saha kabetahanipun wonten ing sakubeng pasisir. Para wisatawan ugi saged ningali plethèking surya wonten ing Pasisir Sigandu, nanging kedah dugi sadèrèngipun jam 5 langkung 30 menit.[4]

Jujugan[besut | besut sumber]

Pasisir Sigandu mapan boten tebih saking Alun-alun Kutha Batang. Saking pusering kutha, wisatawan saged ngener dhateng Margi R.E. Martadinata supados dumugi Dhusun Klidang Lor. Wisatawan boten badhe bingung amargi jujugan dhateng pasisir menika saged kagayuh saking dermagi kanthi tumut panedahing arah wonten sapanjanging margi. Wisatawan saged njujug nganggé titihan piyambak, nganggé pit motor utawi kréta. Menawi angèl njujug dhateng Pasisir Sigandu, wisatawan saged ngupados wonten GPS ing smartphone utawi saged takèn dhumateng warga sakubengipun. Menawi badhé njujug nganggé titihan umum ugi saged kanthi cara nitih bus lajeng mandhap dhateng terminal utawi désa jujugan. Lajeng saged kalajengaken nitih ojèk ingkang wonten ing ngrika.[7]

Tikèt saha fasilitas[besut | besut sumber]

Pasisir Sigandu dipunbikak saben dinten saking jam 6 énjing ngantos jam 6 sonten menawi miturut kaliyan jam operasional-ipun. Ananging wisatawan saged dhateng pasisir sadèrèng utawi sasampunipun jam operasional menika. Reginipun tikèt menawi badhe mlebet Pasisir Sigandu inggih menika 5.000 rupiyah. Sasampunipun bayar tikèt, para wisatawan saged mlebet gapura tumuju Pasisir Sigandu saha Dépok sarta saged mlebet dhateng papan pariwisata kados ta pasisir, kafé, utawi wandé dhaharan wonten tepining pasir. Ananging wonten tikèt terusan ingkang kedah dibayar menawi badhe mlebet dhateng papan pariwisata sanès salebetipun Pasisir Sigandu. Kados ta menawi badhe mlebet dhateng Batang Dolphin Center, wisatawan kedah bayar tikèt gunggungipun 30.000 rupiyah ing dinten Senèn ngantos Jumuwah utawi 40.000 rupiyah ing dinten Setu ngantos Minggu.[5][8][9] Fasilitas ingkang sampun cumawis wonten ing Pasisir Sigandu inggih menika:[10]

  • Papan parkir ingkang wiyar
  • Papan pakémahan
  • Pakiwan saha kulah
  • Langgar
  • Wandé wisata
  • Résto saha kafé
  • Papan foto ingkang saé
  • Wahana ameng-amengan
  • Panyipengan

Rujukan[besut | besut sumber]

  1. ↑ "Destinasi Wisata : Pantai Sigandu | Dinas Pariwisata, Kepemudaan dan Olahraga (Disparpora) Kabupaten Batang". pariwisata.batangkab.go.id. Dibukak ing 2023-09-27.
  2. ↑ digsa.id. "Pariwisata Provinsi Jawa Tengah | Destinasi Wisata | PANTAI SIGANDU". visitjawatengah.jatengprov.go.id (ing basa Inggris). Dibukak ing 2023-09-27.
  3. ↑ "Pantai Sigandu". direktoripariwisata.id. Dibukak ing 2023-09-27.
  4. ↑ a b c d "Pantai Sigandu Suguhan Keindahan Alam di Jawa Tengah - Jawa Tengah". ksmtour.com (ing basa Indonesia). Dibukak ing 2023-09-27.
  5. ↑ a b c "Pantai Sigandu, Dari Sea Cafe, Hingga Spot Yang Instagramable Di Batang - NativeIndonesia.com". www.nativeindonesia.com (ing basa Indonesia). 2022-08-12. Dibukak ing 2023-09-27.
  6. ↑ a b "Keindahan Pantai Sigandu Batang| Jateng Travel Guide". jatengtravelguide.info. Dibukak ing 2023-09-27.
  7. ↑ "Pantai Sigandu Batang - Daya Tarik, Aktivitas Liburan, Lokasi & Harga Tiket - Pesisir" (ing basa Inggris Amérika Sarékat). 2022-08-18. Dibukak ing 2023-09-27.
  8. ↑ digsa.id. "Pariwisata Provinsi Jawa Tengah | Artikel | Bersantai Di Cafe Sepanjang Pantai Sigandu Batang". visitjawatengah.jatengprov.go.id (ing basa Inggris). Dibukak ing 2023-09-27.
  9. ↑ "Menikmati Keindahan Pantai Sigandu di Batang Dolphins Center". news.tamansafari.com. Dibukak ing 2023-09-27.
  10. ↑ Umam, Khairul (2023-03-28). "Pantai Sigandu - Harga Tiket Masuk & Spot Foto Terbaru 2023". Situs Info Tempat Wisata Terbaru & Paket Tour Terpercaya (ing basa Inggris Amérika Sarékat). Diarsip saka sing asli ing 2023-09-27. Dibukak ing 2023-09-27.
Dijupuk saka "https://jv.wikipedia.org/w/index.php?title=Pasisir_Sigandu&oldid=1670594"