Iwak bandeng

Saka Wikipédia Jawa, bauwarna mardika basa Jawa
Bandeng
Klasifikasi ngèlmiah
Karajan: Animalia
Klas: Actinopterygii
Ordho: Gonorynchiformes
Famili: Chanidae
Génus: Chanos
Lacépède, 1803
Spésies: C. chanos
Jeneng binomial
Chanos chanos
(Forsskål, 1775)

Iwak Bandeng utawa Chanos chanos Forsskål ya iku iwak kang bisa dipangan kang akèh tinemu ing Asia Kidul-wétan.[1] Iwak bandeng ya iku siji-sijiné spésies kang isih urip saka famili Chanidae.[1] Iwak bandeng uga diarani iwak bolu ing Makassar lan ing basa Inggris diarani milkfish.[1]

Iwak bandeng akèh urip ing samodra Hindia lan samodra Pasifik lan ing sakupengan pasisir.[1] Iwak bandeng uga urip ing terumbu koral.[1] Iwak kang isih enom lan lagi netes urip ing sagara nganti 2-3 minggu banjur pindhah ing rawa-rawa bakau kang banyuné payau lan kadhang ing rawa utawa tlaga kang banyuné asin.[1] Bandeng mbalik manèh menyang sagara nalika wis diwasa lan bisa manak.[1]

Iwak bandeng kang isih cilik diarani nènèr.[1] Nènèr lumrahé diternakaké utawa dikumpulaké saka kali lan digedhèkaké ing tambak-tambak. Nènèr dipakani saéngga rikat gedhé.[1] Sawisé rada gedhé ukurané 25-30 cm bandeng didol, seger utawa beku.

Bandeng diolah kanthi cara digorèng, dibakar, dikukus, dipindang utawa diasap.[1] Iwak bandeng dagingé ora gampang ajur yèn dimasak.[2] Daging bandeng ana eriné lan ana ambuné kaya lendhut utawa lemah.[2] Eri bandeng sabeneré ya iku balung bandeng.[2] Eri bandeng bisa diprèsto ya iku dimasak ing panci kang nduwé tekanan kang dhuwur.[2] Panci iki diarani panci prèsto utawa autoklaf.[2] Sawisé dimasak ing panci prèsto rasané dadi empuk lan eriné bisa dipangan.[2]

Daging bandeng kang mambu lendhut lumrahé krasa ing bandeng kang dijupuk saka tambak.[2] Nanging bandeng kang diingoni ing karamba ora ana ambuné.[2] Kang njalari mambu lendhut iki ya iku plankton Cyanobacteria, mligi saka génus Oscillatoria, Symloca, dan Lyngbia, kang ngasilaké geosmin.[2] Yèn iwak bandeng urip ing panggonan kang akèh geosmin utawa mangan plankton iki, daging bandeng bakal mambu lemah.[2]

Rasa lendhut ing daging bandeng iki bisa diilangké, carané ya iku kanthi ngingoni iwak suwéné 7-14 dina ing banyu kang mili lan bébas saka biosmin utawa bisa uga nganggo asem kang bisa ngilangi ambu lemah utawa ambu iki.[2]

Chatetan sikil[besut | besut sumber]