Inti sel

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Skema tipikal sel kéwan. Nomor 2 iku inti sel.

Inti sel utawa nukleus sel iku organel sing ditemokaké ing sel eukariotik. Organel iki ngandhut sebagéyan gedhé materi genetik sel kanthi bentuk molekul DNA linear dawa sing mbentuk kromosom bebarengan karo manéka jenis protein kaya histon. Gen ing njeron kromosom-kromosom iki sing mbentuk genom inti sel. Fungsi utama nukleus yaiku kanggo njaga integritas gen-gen mau lan ngontrol aktivitas sel kanthi ngelola ekspresi gen. Saliyané iku, nukleus uga duwé fungsi kanggo ngorganisasi gen nalika dumadi panyigaran sel, mrodhuksi mRNA kanggo ngode protein, minangka papan sintesis ribosom, papan dumadiné replikasi lan transkripsi saka DNA, sarta ngatur kapan lan ing ngendi ekspresi gen kudu diwiwiti, dilakokaké, lan dirampungi. Nukleus arupa organel pisanan sing ditemokaké, sing pisanan didheskripsikaké déning Franz Bauer taun 1802 lan dijabaraké luwih dhetil déning ahli botani Skotlandia, Robert Brown ing taun 1831.

Elemen struktural utama nukleus yaiku membran inti, sawijining membran lapis dhobel sing mbungkus sakabèhaning organel lan misahaké bagéyan inti karo sitoplasma sel, sarta lamina inti, sawijining struktur jroning nukleus sing mènèhi dhukungan mekanis kaya sitoskeleton sing nyokong sel sacara kasluruhan. Sacara garis gedhé, membran inti kapérang saka telung bagéyan, yaiku membran njaba, ruang perinuklear, lan membran njero. Membran njaba nukleus sinambung karo retikulum endoplasma (RE) kasar lan sumebar karo ribosom. Sifat membran inti sing ora permeabel marang sebagéyan gedhé molekul marakaké nukleus merlokaké pori inti supaya molekul bisa obah ngliwati membran. Pori nukleus kaya trowongan sing ana ing membran nukleus sing fungsiné ngubungaké nukleoplasma karo sitosol. Fungsi utama saka pori nukleus yaiku kanggo srana pangijolan molekul antarané nukleus karo sitoplasma. Molekul sing metu, akèh-akèhé mRNA, dipigunakaké kanggo sintesis protein. Pori nukleus kasusun saka 4 subunit, yaiku subunit kolom, subunit anular, subunit lumenal, lan subunit ring. Subunit kolom duwé fungsi ing pambentukan dinding pori nukleus, subunit anular gunané kanggo mbentuk spoke sing ngarah nuju tengah saka pori nukleus, subunit lumenal ngandhut protein transmembran sing nempelaké komplèks pori nukleus marang membran nukleus, éwadéné subunit ring duwé fungsi kanggo mbentuk permukaan sitosolik (adhep-adhepan karo sitoplasma) lan nuklear (adhep-adhepan karo nukleoplasma) saka komplèks pori nukleus.

Senadyan bagéyan njero nukleus ora ngandhut badan sing diwatesi déning membran, isi nukleus ora sragam lan duwé sapérangan badan subnukleus sing kabentuk saka protein-protein unik, molekul RNA, sarta gugus DNA. Conto utama saka badan subnukleus yaiku nukleolus, sing utamané kalibat sajroning pambentukan ribosom. Sawisé diprodhuksi déning nukleolus, ribosom dièkspor nuju sitoplasma kanggo ngleksanakaké fungsi translasi mRNA.

Wacan terusan[sunting | sunting sumber]

Logo Wikimedia Commons
Pirsani galeri bab Inti sel ing Wikimedia Commons.
  • Goldman, Robert D.; Yosef Gruenbaum, Robert D. Moir, Dale K. Shumaker and Timothy P. Spann (2002). "Nuclear lamins: building blocks of nuclear architecture". Genes & Dev. (16): 533–547. doi:10.1101/gad.960502.
  • Görlich, Dirk; Ulrike Kutay (1999). "Transport between the cell nucleus and the cytoplasm". Ann. Rev. Cell Dev. Biol. (15): 607–660. PMID 10611974.
  • Lamond, Angus I.; William C. Earnshaw (24 APRIL 1998). "Structure and Function in the Nucleus". Science 280: 547–553. PMID 9554838.
  • Pennisi E. (2004). "Evolutionary biology. The birth of the nucleus". Science 305 (5685): 766–768. PMID 15297641.
  • Pollard, Thomas D.; William C. Earnshaw (2004). Cell Biology. Philadelphia: Saunders. ISBN 0-7216-3360-9.

Sumber artikel punika saking kaca situs web: "http://jv.wikipedia.org/w/index.php?title=Inti_sel&oldid=815914"