Basa Ibrani

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Basa Ibrani (עברית [I'vrit])
Dipituturaké ing: Israèl
Cacahé penutur: 7 yuta jiwa
Urutan kaping: ora ing tingkatan 100 gedhé
Rumpun basa
Klasifikasi:
Afro-Asia

 Semitik
  Basa Kanaanit
   Ibrani

Status resmi
Basa resmi: Israèl
Diatur déning: Akademi Basa Ibrani
Kodhe Basa
ISO 639-1 he
ISO 639-2 heb
SIL HBR

Basa Ibrani (עברית, ‘Ivrit) iku sawijining basa Semitik saka rumpun basa Afro-Asia sing saiki dipituturaké déning luwih saka 7 yuta jiwa ing Israèl lan sacacahing wong sajeroning komunitas Yahudi saubenging donya. Ing Israèl, basa iki basa negara de facto lan salah sijining basa resmi. Basa resmi sijiné yaiku basa Arab. Ing Israèl basa Ibrani dipituturaké déning mayoritas pedunung negara iki.

Sajarah cekak[sunting | sunting sumber]

Intisarining Tanakh (Alkitab Ibrani תנ"ך) iku tinulis ing basa Ibrani Klasik, lan akèh sing bentuké ditilasaké nganti saiki iku utamané dhialèk Ibrani Alkitab sing naté berkembang sakiwa-tengené abad kaping 6 SM, nyedhaki Pangguwangan Babilonia. Amerga iki basa Ibrani wiwit mbiyèn diarani Leshôn Ha-Kôdesh (לשון הקודש), "Basa Kudus", déning wong-wong Yahudi.

Mayoritas para pakar basa sarujuk yèn sawisé abad kaping 6 SM, nalika Kakaisaran Neo-Babilonia mbedhah Yerusalem lan ngguwang pedunungé menyang Babilon lan Sirus Agung, utawa Maharaja Persia maringi idin pareng mulih, basa Ibrani Alkitab sing katulis ing Alkitab ing panggunan sadina-dina diganti déning dhialèk-dhialèk anyar Ibrani lan sawijining vèrsi lokal basa Aram. Sawisé abad kaping 2, nalika Kakaisaran Romawi mbuwang pedunung Yahudi saka Yerusalem lan bagéan-bagéan negara Bar Kokhba, basa Ibrani angangsur-angsur ilang ora dadi basa sing dipituturaké manèh nanging tetep dadi basa sastra wigati. Layang-layang, kontrak, dagang, sains, filsafat, kadhokteran, tembang, lan undhang-undhang tetep tinulis ing basa Ibrani sing miwiti nyerep lan nyilih tembung-tembung saka basa liya lan inovasi tembung anyar.

Basa Ibrani salawasé 2.000 taunan dadi basa tinulis waé sing digunakaké déning komunitas Yahudi sadonya nganti dicoba digunakaké dadi basa lisan manèh ing pungkasan abad kaping 19 ing Palèstina déning usahané Eliezer Ben-Yehuda, sawijining aktivis Yahudi sing dudu pakar basa. Ben-Yehuda iku sawijining Zionis. Nalika iku Palèstina sing kala semana sawijining provinsi Turki Ottoman, ditekani wong-wong Yahudi sing ngungsi saka Eropah. Para pangungsi iki mituturaké basa sing séjé-séjé, kayata basa Yiddish lan basa Rusia, dadi sawijining basa panunggal diprelokaké.

Basa Ibrani banjur digunakaké manèh lan ditambah-tambahi tetembungan saka basa-basa Eropah, utamané basa Rusia, basa Jerman, lan basa Prancis. Saliyané iku utamané Ben-Yehuda uga nambah-nambahi tetembungan saka basa Arab sing isih kerabat. Sawisé iku basa Ibrani dadi basa resmi ing Dhaérah Mandat Britania Palestina ing taun 1921 karo basa Arab lan basa Inggris. Banjur ing taun 1948 nalika negara Israèl diproklamasèkaké, basa Ibrani dadi basa resmi Negara Israèl.

Aksara Ibrani[sunting | sunting sumber]

Aksara Jeneng Uni Transkripsi
א Alef /'/  
ב Beth /b/ /v/ b
ג Gimmel /g/ g
ד Dalet /d/ d
ה He /h/ h
ו Waw /v/ v
ז Zayin /z/ z
ח Kheth /x/ kh
ט Thet /t/ t
י Yod /y/ y
ך כ Kaf /k/ /kh/ k
ל Lamed /l/ l
ם מ Mem /m/ m
ן נ Nun /n/ n
ס Sammeg /s/ s
ע 'Ain /?/ '
ף פ Pe /p/ /f/ p
ץ צ Tsade /ts/ ts
ק Qaf /q/ q
ר Resy /r/ r
ש Syin /sy/ /s/ sy
ת Taf /t/ t

Abjad Ibrani kasusun saka 22 aksara. Tèks Ibrani kuna iku ditulis gundhul tanpa swara.

Sumber artikel punika saking kaca situs web: "http://jv.wikipedia.org/w/index.php?title=Basa_Ibrani&oldid=812415"