Undhang-Undhang Amnèsti (Suriname)

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian

Undhang-Undhang Amnèsti Suriname (Walanda Surinaamse Amnestiewet) iku undhang-undhang saka taun 1992 sing mula-mulané maringi amnèsti kanggo 20 aksi sing nglanggar katentoan saka Kitab Undhang-Undhang Kukum Pradata Suriname (Wetboek van Strafrecht) lan dilakoni antara tanggal 1 januari 1985 nganti 19 Agustus 1992.[1] Ing tanggal 4 April 2012, undhang-undhang iki diowahi déning parlemèn Suriname (De Nationale Assemblée) lan témponé didawakaké lan wiwité dadi luwih awal. Dadi kasilé tindhakan sing nglanggar kukum antara tanggal 1 April 1980 lan 31 Dhésèmber 1984 uga mèlu kacakup. Kalebu tindhakan kadurjanan sing diapurani mawa undhang-undhang iki uga prastawa Pamatènan Dhésèmber sing kalaksanan nalika présidhèn Suriname kala iku lagi njabat lan diadili ing sawijining pangadilan militèr.

Amandemèn undhang-undhang iki disarujuki déning para parté koalisi. Sok sapaa sing mènèhi swara kudu mbèbèraké jenengé (hoofdelijke stemming). Pungkasané sing sarujuk 28 anggota parlemèn lan sing nulak ana 12. Antarané sing nulak ya iku manten présidhèn Ronald Venetiaan sing kèlangan kanca raket nalika prastawa Pamatènan Dhésèmber iki. Undhang-undhang iki diabsahaké ing tanggal 5 April déning présidhèn ad interim Robert Ameerali, sing nggantèni Bouterse amarga dhèwèké lagi ana ing nagara manca. Amandemèn iki dibéla mawa prinsip kesamaan, lan nyegah supaya aja ana instabilitas menawaa Bouterse iku bakal divonis lan nggawa karukunan sajeroning masarakat. Sanadyan mangkono, pamaréntah Suriname uga ngomongaké anané komisi panggolèk fakta.

Amandemèn iki dikecam déning komunitas internasional kanthi amba. Déning sawetara nagara lan organisasi internasional kaya ta manten kolonisator Walanda, Uni Éropah lan Amnesty International[2] dianggep nglanggar orde kukum internasional. Walanda malahan nimbali balik Duta Agungé minangka réaksi marang undhang-undhang iki.

Réferènsi lan cathetan suku[besut | besut sumber]