Seni rupa ing Yogyakarta
Seni rupa ing Yogyakarta iku tegesé kabèh kagiyatan ngenani seni rupa, kaya déné pamèran, seminar, rembugan, lokakarya, lan gladhèn, kang diayahi panti-panti budaya pamaréntah lan swasta ing laladan Yogyakarta. Seni rupa ing Yogyakarta kapétung wigati ing jagat seni rupa Indonésia awit anané akadhemi seni, gladri, balé seni, lan studhiyo seni ing wewengkon iku. Ing Yogyakarta uga kondhang akèh dumunung seniman misuwur lan ginelar acara seni gedhé, kaya ta Biennale Jogja.[1]
Kagiyatan[besut | besut sumber]
Kagiyatan paméran seni rupa ing Yogyakarta racaké wujud paméran tunggal, golongan, utawa gabungan. Paméran-paméran iki mamèraké manéka seni, nyrambahi seni lukis, seni patung, seni kriya, seni fotografi, seni instalasi, seni grafis, seni serat, seni vidhiyo. Akèh-akèhé paméran iku diprakarsani para parupané dhéwé. Ing Yogyakarta uga kerep ginelar paméran karya-karya seniman mancanagara lan karya-karya tembayatan seniman Yogyakarta lan mancanagara.[1]
Acara seni rupa ing Yogyakarta akèhé ngancik udakara 250 acara saben taun. Salah siji acara seni ing Yogyakarta kang kapétung gedhé tur wigati sa-Indonésia ya iku Biennale Jogja. Acara rong taunan kang dilekasi Taman Budaya Yogyakarta taun 1988 iki dadi rujukan pokok tumrap tuwuhing seni rupa Indonésia. Kawit Biennale Jogja VIII (taun 2005), ing saben Biennale Jogja diayahi acara awèh Lifetime Achievement Award marang wong-wong kang duwé lelabuhan, daya cipta, lan prèstasi kang njiwani jagat seni rupa Indonésia. Wiwit taun 2010, Biennale Jogja dikemunah Yayasan Biennale Yogyakarta.[1]
Kagiyatan seni publik uga lumrah ing papan-papan umum ing Yogyakarta, mligi seni mural. Seni mural Yogyakarta manéka warna irah-irahané, ngrembug wiwit prakara antara manungsa nganti prakara pulitik.[1]
Parupa[besut | besut sumber]
Akèh-akèhé seniman kang nggiyataké jagat seni rupa modhèren lan kontèmporèr Indonésia dumunung ing Yogyakarta. Nalika 2011, parupa ing Yogyakarta kang giyat ana udakara wong 900-1.200. Sawenèh parupa Yogyakarta ya iku: Kartika Affandi, Entang Wiharso, Putu Sutawijaya, Edhi Sunaryo, Heri Dono, Nindityo Adipurnomo, Handiwirman Saputra, Budi Ubrux, Agus Suwage, Lucia Hartini, Tita Rubi, Yunizar, Nyoman Masriadi, Rudi Mantofani, Djoko Pekik, Nasirun, S Tedy D, Sigit Santosa, Mella Jaarsma, Samuel Indratma, lan Angki Purbandono.[1]
Gladri[besut | besut sumber]
Ing Yogyakarta, sumrambah sawenèh gladri seni rupa. Ana limang gladri kang kapétung kondhang ing Yogyakarta, dumadi Rumah Seni Cemeti, Kedai Kebun Forum, Tujuh Bintang Arts Space, Srisasanti Gallery, lan Sangkring Arts Space.[1]
Rujukan[besut | besut sumber]
- Cathetan sikil
- Bibliografi
- Dwiyanto, Djoko; Guntari, Much.; Astuti, Dwi Puji, èd. (2011). Yogyakarta Istimewa: Budaya Membuktikannya. Yogyakarta: Dinas Kebudayaan Provinsi DIY.