Prabu Basukiswara

Saka Wikipédia Jawa, bauwarna mardika basa Jawa

Prabu Basukiswara (Prabu Basuparicara) iku narendra agung binathara nyakrawati abau dhendha, angadhaton ing Cedhiwisaya. Sang Prabu iku darah Porawa, tegese tedhak/anak Puru. Salaras karo tembung Kurawa anak/tedhak Kuru, Yadawa anak Yadu, Pandhawa anak Pandhu.

Amarga saking genture kasutapane, Prabu Basukiswara ratu ing Cedhiwisaya iku pinaringan nugraha warna 5 dening Bathara Indra, yaiku:

  1. Kreta kencana aran Amarajaya, bisa mabur ing akasa kaya titihane para dewa. Mulane Prabu Basukiswara bisa lelana tekan ngendi wae kang dikersakake.
  2. Dwaja (gendera) kang njalari unggul ing yuda.
  3. Sangsangan (kalung) kembang terate kang ora bisa alum salawas-lawase. Njalari Sang Prabu ora tedhas tapak paluning pandhe, sisaning gurenda (gegaman gaweyane para empu).
  4. Landheyan bambu minangka tandha yekti setya bektine Sang Prabu marang dewa. Saben Prabu Basukiswara manembah marang dewa, landheyan iku ditancepake ing bantala.
  5. Lebda (mumpuni, pinter) wawan sabda karo sawarnaning sato kewan.

Nalika pinaringan nugraha warna 5 iku, Prabu Basukiswara dingendikani dening Bathara Indra, ndikakake tansah memayu hayuning bawana alandhesan kautaman lan kawicaksanan, supaya ing tembe samangsa murud ing kasedan jati (mati), bisa ngunggahi jagade Bathara Ari (bebisike/asmane liya Bathara Indra).

Prabu Basukiswara (Basuparicara) peputra 5, kabeh asipat wirotama (wira+utama=pahlawan pinunjul/prajurit utama) sekti mandraguna, yaiku (1) Wrihatrata, (2) Pratiyagraha, (3) Kusumwa (Maniwahana), (4)Mawila, (5) Yadu.

Putra 5 iku padha dijumenengake ratu kabeh ana ing sajroning laladan praja Cedhiwisaya. Putra kang pambayun (mbarep, pisanan) yaiku Sang Wrihatrata, bareng jumeneng ratu jejuluk Prabu Maharata, negarane sinebut Magada. Para rajaputra liyane jejuluke ratu lan araning negarane padha karo asmane rajaputra iku dhewe-dhewe yaiku: Prabu Pratiyagraha, Prabu Maniwahana, Prabu Mawila, lan Prabu Yadu, lan araning negarane: Pratiyagraha, Maniwahana, Mawila, lan Yadu.

Praja Cedhiwisaya iku kliwatan kali gedhe aran Suktimati kang tuke saka Gunung Kolagiri utawa Kolahala. Kali iku kerep diganggu dening Gunung Kolagiri, amarga gunung iku gandrung wuyung marang Kali Suktimati. Amarga ora dilanggati, gunung iku nekat ngrodhapeksa Kali Suktimati, satemah banyu kali iku ora mili (yen wong, ora garapsari). Wohing rodhapeksa (diperkosa), Kali Suktimati nglairake bocah kedhana-kedhini (bocah 2 lanang lan wadon). Aneh ya? Gunung ngrodhapeksa kali, anak-anak manungsa. Iki crita wayang, aja dieyeli. Iki mengku sanepa sing kudu diwiyak, dionceki.

Kaya ngapa dukane Prabu Basukiswara, bareng priksa yen kang nyebabake Kali Suktimati ora mili banyune iku awit pokale Gunung Kolagiri. Mula gunung iku banjur dilebur dening Sang Prabu. Lebure gunung, Prabu Basukiswara nemokake bocah kedhana-kedhini. Bocah 2 iku anake Kali Suktimati patutan karo Gunung Kolagiri.

Minangka tandhaning atur panuwune olehe wis diuwalake saka panggodhane Gunung Kolagiri, Kali Suktimati misungsungake bocah 2 iku marang Prabu Basukiswara. Bocah 2 iku, lanange kaparingan jeneng Wasuprada dening Sang Prabu, wadone pinaringan jeneng Dewi Girika. Banjur diasta kondur ing kedhaton. Diupakara, digulawenthah dening Sang Prabu. Bareng diwasa, Dewi Girika katon ayune. Nuli dipundhut garwa dening Sang Prabu. Dene Wasuprada/Basuprada didakekake senapati perang wadyabala Cedhiwisaya.