Peksi Moi

Peksi Moi ya iku beksan kang ngrembaka ing tlatah Sléman. Peksi Moi iku cekakan saka "Persatuan Kesenian Islam Main Olahraga Bela Diri". Beksan iki dipopulèraké déning K.H. Nahrowi, salah siji ulama saka Ploso Kuning, Minamartani, Ngaglik, Sléman nalika taun 1954. Peksi Moi bisa diarani klumpukan obahan pencak silat kang kairingan karo instrumèn. Saben instrumèn lan tembang kang diunèkaké ndarbèni obahan béda-béda kang liriké ngandhut ajakan ngibadah lan nyawijikaké bangsa. Wektu pagelaran Peksi Moi iku ana kang cepet lan suwé, kurang luwih sak jam.

Wedharan

Ing Peksi Moi, ana sawenèh peran kang dilakoni, antarané ya iku pambeksa, juru musik, lan juru nembang. Ing pagelaran Peksi Moi, ana pambeksa cacah 12 nganti 16, bareng karo patang juru musik kang mainaké kendhang (sak wong) lan rebana (telung wong), lan uga rong juru nembang. Pagelaran beksan dumadi saka wong lanang lan wadon kanthi kairingan 35 tembang. Tembangé mung arupa syair-syair ajakan ngibadah lan ora nduwèni alur carita. Uga ana telung jinis basa lan siji reroncèn nada kang dianggo ing syair Peksi Moi, ya iku basa Arab (8 bait). Sandhangan kang dianggo ya iku klambi werna putih diblebed karo rompi werna biru, jingga, lan ungu. Ing bagéan weteng nganggo stagèn; udheng mawa variasi wulu, kathok werna ireng diblebed karo jarik motif parang. Seragam ing Peksi Moi bola-bali diowahi wiwit jaman biyèn tekan sapréné mawa rancangan kang menarik lan jumbuh karo owah gingsiring jaman.

Peksi Moi dadi bagéan wigati tumrap bebrayan ing Dhusun Soka Wétan, minangka sawiji kagunan tradhisi mawa nuwansa Islam kang diugemi bebrayan ing padinan. Peksi Moi dadi idhèntitas bebrayan kanggo nyaluraké èksprèsi kaberagaman, uga dadi sarana silaturahmi para warga, malah bisa ngasilaké dhuwit tumrap para juru mainé.

Rujukan

Kapustakan

• Paluseri, Dais Dharmawan; et al. (2018). Penetapan Warisan Budaya Takbenda Indonesia Tahun 2018 (PDF). Jakarta: Direktorat Warisan dan Diplomasi Budaya, Direktorat Jenderal Kebudayaan, Kementerian Pendidikan dan Kebudayaan.
• Rachman, Abd (1980). Kesenian Rakyat Peksi Moi di Daerah Kabupaten Sleman (PDF). Yogyakarta: UPT Perpustakaan ISI Yogyakarta.