Pasisir Pandhansari

Pasisir Pandhanbaru ꧌ꦥꦱꦶꦱꦶꦂꦥꦤ꧀ꦝꦤ꧀ꦧꦫꦸ꧍

Salah sawijiné papan wisata pasisir sing ana ing tlatah Bantul. Prenahé ana ing Wonoroto, Gadingsari, Sandèn, Bantul, Daérah Istiméwa Yogyakarta. Jarak saka kutha Yogya kurang luwih 21 kilometer utawa mbutuhaké wektu udakara 60 menit. Pasisir Pandhanbaru minangka pasisir sing duwèni tetuwuhan awujud cemara laut sing kaya déné pager wates antarané pasisir lan  daratan.

Mirunggané Pasisir Pandhanbaru

1. Menara Suar sing dhuwuré kurang luwih 40 meter dadi tetenger sing mirunggan ing pasisir Pandhanbaru jalaran ora kabèh pasisir duwèni menara suar. Anané menara suar iki sing wis cetha gunanaé yaiku kanggo panuduh kapal sing ana ing segara nemtokaké dalan utawa panggonan sing arep dituju. Ananging saliyané iku uga bisa narik para wisatawan sing arep mlebu ing pasisir awit papan panggonané menara suar iki ana ing dalan sadurungé mlebu ing pasisir. Para wisatawan sing plesir ing pasisir Pandhansari sing kendel bisa ngrasakaké pengalaman munggah menara suar iki kanthi napak saben andha mubeng tekan punthuking menara suar. Ing ndhuwur menara suar yèn wanci sore para wisatawan bisa nyawang srengéngé lekas angslup mangulon lan bisa njupuk foto-foto sing éndah.
2. Wit cemara laut sing pating ngrembuyung dadi salah sawijiné bab sing narik kawigatèné para wisatawan. Cemara laut sing ditandur sadawané pinggiran pasisir Pandhanbaru iki ndadèkaké swasana sing èdhum lan ndemenakaké kanggoné sing kepingin ngaso dolan-dolan ing pasisir iki. Ditambah manèh anané wit cemara sing wis bakoh diwènèhi bandhulan kanggo ayun-ayunan sing digawé saka blabak kayu lan ditalèni tali tampar utawa dhadhung mula bisa digunakaké para wisatawan foto-foto utawa lèrèn sinambi nyawang sesawangan segara. Ing ngisor cemara sing èdhum iki bisa uga digunakaké kanggo dolanan pasir.
3. Camping ground utawa papan jembar sing rata bisa digunakaké kanggo kémah bebarengan kulawarga utawa kanca. Papan kémah iki duwèni fasilitas sing bisa digunakaké déning para wisatawan kaya ta pendhapa, mushola utawa langgar, lan pakiwan sing kebèh isih dirumat kanthi becik lan resik. Ananging yèn kepingin ngrasakaké kémah ana ing kéné beciké nggawa piranti kémah amarga pengelola pasisir Pandhansari durung nyepakaké manéka keperluan sing digunakaké kanggo kémah.

Jam Bukak lan Rega Tiket

Pasisir Pandhansari bukak saben dina wiwit jam 06.00-18.00 WIB kanthi rega tiket Rp10.000 saben wong  lan parikir saben motor Rp5.000

Pasisir utawa Panggo Plesir Sacedhaké Pasisir Pandhansari

1. Pasisir Parangtritis
2. Pasisir Parangkusuma
3. Pasisir Parangendhog
4. Pasisir Samas
5. Pasisir Baru
6. Pasisir Pandhansima
7. Pasisir Kuwaru
8. Pasisir Guwa Cemara
9. Padusan Parangwédang
10. Pasisir Dhépok
11. Pasisir Gesing

Pratelan

• Pantai Pandansari. visitingjogja.jogjaprov.go.id. Diakses pada 27 September 2023.
• Inilah Wisata Pantai Hits. bob.kemenparekraf.go.id. Diakses pada 27 September 2023.
• Wisata Pantai Pandansari. liburmulu.com. Diakses pada 27 September 2023.