Onomatopé

Saka Wikipédia Jawa, bauwarna bébas abasa Jawa
Tandha ing sawiji cendhéla toko ing Itali tinulisan "No Tic Tac", tulisan sing mindha swaraning jam.

Onomatopé (saka tembung Yunani ὀνοματοποιία;[1] ὄνομα tegesé "jeneng"[2] lan ποιέω tegesé "aku nggawé"[3]) iku tembung sing kanthi fonètis niru, ngémba, utawa mratandhani swaraning wewujudan. Onomatopé kagolong tembung aran. Conto-conto onomatopé sing umum ya iku swaraning kéwan kaya ta "guk", "méyong", "mbèk", utawa "tekèk". Onomatopé béda-béda saben basa, gumantung marang sistem basané.[4][5] Mula, swaraning jam iku tick tock ing basa Inggris, dī dā ing basa Mandharin, utawa katchin katchin ing basa Jepang, utawa "tik-tik" (टिक-टिक) ing basa Indhi.

Sanajan tegesé ing basa Jawa "tetironing swara", tembung onomatopé ing basa asalé, basa Yunani, ateges "nggawé jeneng." Éwadéné, tembung-tembung sing niru swara ingaran Ηχομιμητικό (echomimetico utawa ékomimètik, tegesé "tetironing gaung") ing basa Yunani. Ηχομιμητικό (echomimetico) tumurun saka tembung Ηχώ, tegesé "gaung utawa swara", lan tembung μιμητικό, tegesé "tetiron".

Rujukan[besut | besut sumber]

  1. ^ ὀνοματοποιία, Henry George Liddell, Robert Scott, A Greek-English Lexicon, on Perseus
  2. ^ ὄνομα, Henry George Liddell, Robert Scott, A Greek-English Lexicon, on Perseus
  3. ^ ποιέω, Henry George Liddell, Robert Scott, A Greek-English Lexicon, on Perseus
  4. ^ Onomatopoeia as a Figure and a Linguistic Principle, Hugh Bredin, The Johns Hopkins University, Retrieved November 14, 2013
  5. ^ Definition of Onomatopoeia, Retrieved November 14, 2013