Leif Ericsson

Leif Eriksson (basa Èslan kina: Leifr Eiríksson) punika satunggiling panjlajah, putra Erik Sang Abrit (Eiríkr rauði). Ibunipun inggih Þjoðhildr. Bapanipun ingkang miwiti kalih koloni Nurwègen, Pakuwon Kulon saha Pakuwon Wétan ing Tanah Ijem (Grunlan) ingkang dipunsukani nama déning piyambakipun..

Rikala wonten ing Nurwègen, Leif mlebet agami Kristen. Lajeng nalika sampun wangsul ing Tanah Ijem, tumbas praunipun Bjarni Herjólfsson kaliyan tindhak nuwèni dharatan ingkang sampun dipunpanggihi déning Bjarni.

Saga Grænlendinga (Cariyos Tanah Ijem) awuwus manawi Leif miwiti panjlajahipun saking kiwa tengenipun warsa 1000 kanggé ngrunut rute Bjarni saking arah sabalikipun. Papan pratami ingkang dipunpanggihi kebek lèmpèngan séla radin (basa Èslan: hellur). Amargi makaten, papan punika dipunsukani nama Helluland (siti ingkang kathah séla radinipun). Mbokmenawi ingkang dipunmaksud inggih tlatah ingkang dipunwastani Kapuloan Baffin samangké.

Salajengipun, piyambakipun mamanggihi dharatan ingkang radin saha kathah kajengipun (kayu), mawi pasisir pasisir awedhi pethak ingkang dipunwastani Markland (siti kajeng). Wonten kamungkinan ingkang dipunkarepaken Labrador. Rikala apapanggih dharatan malih, Leif saha awakipun ndharat kaliyan yasa pinten-pinten griya. Sedaya remen dharatan punika: awit kathah ulam salmon ing lèpèn-lèpèn. Lajeng hawanipun eca, ing mangsa asrep boten patiya asrep lajeng ing mangsa panas boten patiya bentèr. Ing mangsa asrep sesuketan ugi taksih ijem-ijem. Sedaya lajeng manggèn wonten riku sadanguning mangsa asrep. Cariyos ingkang sami ugi nyebat satunggiling awak baita anami Tyrkir, bokmanawi tiyang Jerman, ingkang manggihaken anggur. Leif lajeng nyukani nama siti punika Vínland, ingkang tegesipun ‘Siti Anggur’. Rikala wangsul, Leif nulungi satunggiling tiyang Nurwègen, dados piyambakipun dipunwastani 'Leif ingkang Mujur' (basa Nurwègen Kina: "Leifr hinn heppni").

Leif gadhah sedhèrèk jaler kalih Þorvaldur kaliyan Þorsteinn, saha èstri satunggil, Freydís. Leif émah-émah kaliyan Þórgunna, lajeng dipunparingi putra satunggal, Þorkell Leifsson.

Pranala njawi

• Potret Leif Ericsson kasil rekonstruksi ulang karya Marco Bakker: Reportret: Leif Ericsson.