Kurung

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian

Kurung (Gleichinia linearis) ya iku sawijining tuwuhan paku kang tuwuh sumebar warata ing Indonésia, saéngga nduwé aran béda-béda saben panggonan. Ing Acéh kena diarani reusam, ing Minang ransam utawa rasam, ing Sundha paku andam utawa paku payung. Ing Jawa dhéwé diarani pakis andam, pakis bantèngan, pakis kurung, pakis pranjangan, lan liya-liyané.

Minangka sawijining tuwuhan paku, tuwuhan pakis kurung thukul nglinting. Ing Jawa lumrahé bisa tuwuh ana ing papan kang ajeg udan, udakara 2.800 m dpl. Wujudé tetuwuhan iki uga kaya suket, gedhènè udakara 3-5 cm lan dawanè isa tekan 10-15 cm. Godhong lan wit-witané piguna ing pakebonan tèh kanggo pawijén utawa stèk godhong.

Ing kapungkur, wit pakis kurung kadadèkaké sulih pena (kalam) saperlu kanggo nulis aksara Arab ing pondok pesantrèn. Amarga kuwi, Rumphius naté maringi tetengér tuwuhan pakis kurung iki Filix calamaria. Para panaliti saka Walanda uga mbabaraké yèn kulit wit pakis kurung ing kapungkur uga piguna kanggo anyaman déning warga Lumajang, lan bagéan njeroné kena kanggo anyaman kopyah.[1]

Arane désa[besut | besut sumber]

Désa-désa ing Jawa Wétan/Jawa Tengah/DIY kang nganggo jeneng kurung kanggo tenger désa ya iku:

Nomer Désa/Kalurahan Kacamatan Kabupatèn
1 Kurung Kejayan Pasuruan
2 Gempol Kurung Menganti Gresik
3 Kurungrejo Prambon Nganjuk
4 Kurung Ceper Klaten

Rujukan[besut | besut sumber]

  1. Budhi Santosa, Iman (2017). Suta Naya Dhadhap Waru. Yogyakarta: Interlude. k. 264. ISBN 978-602-6250-42-1.