Krama ngoko

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian

Ing basa Jawa, krama ngoko iku golonganing tembung ngoko kang ora ana padhané ing tembung krama. Amarga ora duwé padhan tembung krama, tembung ngoko mau banjur bisa kanggo ing basa krama[1]. Contoné tembung krama ngoko iku adhi, adus, cangkem, dolan, lambé, lsp.

Tembung krama ngoko kang dikramakaké aran krama enggon-enggonan lan kalebu tembung kang ora baku. Cacahé tembung krama ngoko iku akèh ing basa Jawa lan sapérangané duwé padhan tembung krama inggil[1]. Ing bausastra-bausastra Jawa, tembung-tembung krama ngoko tinengeran kn. utawa KN.

Panganggoning tembung[besut | besut sumber]

Minangka tembung ngoko, tembung-tembung krama ngoko bisa kanggo ing basa ngoko. Mangkonoa, tembung-tembung mau bisa kanggo ing basa krama amarga ora duwé padhan tembung krama. Ing ngisor iki contoné panganggoné tembung krama ngoko ing basa ngoko lan krama lumantar tembung kuwung lan lambé kang tinengeran kn. ing Bausastra Jawa.

Basa ngoko

(1) Lambéné dibèngèsi abang.
(2) Bubar udan, kuwung katon ing langit.

Basa krama

(1) Lambénipun dipunbèngèsi abrit.
(2) Bibar jawah, kuwung katingal ing langit.

Sapérangan tembung krama ngoko duwé padhan tembung krama inggil. Tembung-tembung kang mangkono salin dadi tembung krama inggil ing basa ngoko alus lan krama alus. Contoné ya iku tembung lambé kang duwé padhan tembung krama inggil lathi, déné kuwung ora duwé padhan tembung krama inggil, mula ora prelu salin tembung.

Basa ngoko

(1) Lathiné dibèngèsi abang. (ngoko alus)
(2) Bubar udan, kuwung katon ing langit.

Basa krama

(1) Lathinipun dipunbèngèsi abrit. (krama alus)
(2) Bibar jawah, kuwung katingal ing langit.

Cathetan sikil[besut | besut sumber]

  1. a b Gina 2012, k. 96.

Réferènsi[besut | besut sumber]