Kendama

Saka Wikipédia Jawa, bauwarna mardika basa Jawa
Jump to navigation Jump to search
Kendama
Bilboquet

Kendama (けん玉 utawi 剣玉?) inggih punika nama satunggaling dolanan ingkang asalipun saking Jepang. Dolanan punika wujud bal ingkang wonten bolonganipun (tama) ingkang dipuniket déning tali ing sawijining palang (ken) ingkang wujudipun mirib kados palu. Wonten ing Jepang, dolanan punika dipundamel lomba ing kompetisi tingkat nasional. Kendama ugi wonten ingkang kanggé tiyang ingkang kidal.

Pérangan dhuwur pucuking gagang ken punika dipunsebat kensaki (pucuk ken). Pucuk punika wujudipun lancip kados paku kanggé mlebetaken bal. Ing ujung sisih kiwa lan sisih tengen palang wonten legokan ingkang dipun-ginakaken kanggé nyathok bal, Legokan ingkang diameteripun langkung ageng punika dipunwastani ōzara (piring ageng). Déné ingkang legokan mawi diamèter langkung alit dipunsebat kozara (piring alit). Legokan wonten ing pucuk gagang ken pérangan ngandhap mau dipunsebat chūzara (piring sedhengan) sanajan kasunyatanipun diamèteripun langkung alit saking kozara.

Kendama dipuncipta nalika taun 1918 déning Hamaji Egusa ingkang asalipun saking kutha Kure, Prefektur Hiroshima. Ing wiwitanipun, dolanan mau dipunparingi nama "Nichi Getsu Ball".[1] Wiwit saking abad kaping 16, tiyang Prancis ugi sampun gadhah dolanan ketangakasan ingkang sami kaliyan kendama ingkang dipunsebat bilboquet (bilpiyambak ateges "bola" lan boquet punika ateges "wit alit"). Benten kaliyan kendama, bilboquet namung gadhah legokan ing kalih pucuk tongkat.[2] Asosiasi Kendama Jepang (Nihon Kendama Kyōkai) punika kalebet organisasi nirlaba ingkang gadhah usaha miyaraken dolanan kendama, ngatur standar teknik lan trik anggènipun dolanan kendama, sarta nemtokaken tataran kapinteran lan rangking tiyang ingkang dolanan. Asosiasi mau ugi nyade dolanan kendama ingkang trep kaliyan standar asosiasi ingkang sampun katemtokaken.

Cara dolanan kendama[besut | besut sumber]

Dolanan kendama punika ngenal sapérangan tèknik anggènipun nyekel ken. Kajawi punika ugi teknik nyekel bal supados ngasilaken trik-trik ingkang béda. Kathahipun obahan anggènipun dolanan kendama kawiwitan kanthi mbeta bal dhateng kaanan ingkang gumantung marang ken. Tiyang ingkang dolanan damel obahing ken supados bal saged muncal marang arah dhuwur. lajeng bal ingkang dhawah kedah dipuncekel déning salah satunggaling pérangan ken. Kajawi punika saged ugi bal mau dipunlebetaken ing pucuk ingkang lancip punika. Anggenipun dolanan kendama punika mbetahaken ketangkasan obahan tiyang ingkang dolanan kendama. Pemain ingkang saged nguwaosi tèknik tingkat lanjur punika saged nyekel bal kanthi urut-urutan obahan ingkang sampun dipuntemtokaken sadèrèngipun.

Cathetan suku[besut | besut sumber]

  1. ^ "Shape & Structure". Japan Kendama Association. 
  2. ^ "Kendama". Kids Web Japan. 

Pranala njawi[besut | besut sumber]