Kedhung Cinèt

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian

Kedhung Cinèt yaiku pariwisata alami ingkang awujud kali sajeroning tengah alas. Ing sapinggir kali ana tebing-tebing saka watu kapur sing ndadèkaké kali luwih éndah. Kedhung Cinèt mapan ing Dusun Pojok Klithih, Désa Klithih, Kecamatan Plandhakan, Kabupatèn Jombang. Wisata alam iki asring diarani minangka vérsi mini Grand Canyon sing ana ing Kali Colorado, Amérikah Sarékat.[1]

Kedhung Cinèt ing Jombang

Saiki Kedhung Cinèt dadi salah sawijining ikon wisata ing Kabupatèn Jombang amarga kaéndahané pemandangan sing unik. Situs wisata Kedhung Cinèt sing ditrapaké yaiku bagian kang ana ing ngisor banyu terjun. Rong dalan mlebu ing Kedhung Cinèt wis ditutup lan ora olèh diparani pengunjung amarga wis kaping pirang-pirang pengunjung lemut ing kana.[2]

Dalan[besut | besut sumber]

Kanggo mara ing Kedhung Cinèt dibutuhaké perjalanan udakara 10 kilomèter saka jembatan Brantas, Plasa. Sadawané dalan, bakal ngliwati pemandangan ijo saka alas jati, sawah, lan keboné para warga. Saka Jombang langsung anuju jembatan Ploso banjur ngiwa menyang Plandhakan (arah Nganjuk lan Kertasana).

Satekaning ing Polsèk Plandhakan, nyisih ngiwa manèh banjur nututi dalan mlebu Désa Klithih. Yèn wis mlebu wilayah wisata Kedhung Cinèt, bakal disambut déning papan tandha ingkang katulis "Welcome to Cinet Adventure Forest".

Poténsi[besut | besut sumber]

Kedhung Cinèt sejatiné duwé poténsi, kekuwatan lan kaunggulan sing ora diduwéni karo papan wisata liyané. Salajengé, perlu ditindaklanjuti lan diberdayakaké déning pamréntah babagan nggawé kabijakan, saéngga dadi stratégi kanggo ngembangaké poténsi lan daya tarik sing cocog, èfèktif lan èfisièn.[3]

Kahanan[besut | besut sumber]

Sadurungé mlebu ing Kedhung Cinèt, ana jembatan goyang sing kudu diliwati luwih dhisik. Jembatan iku diarani jembatan goyang amarga jembatan kasebut bakal obah-obah nalika disabrangi utawa kena angin.

Sawisé ngliwati jembatan goyang, pengunjung bakal bisa ndeleng aliran kali kang warnané ijo bening. Ing sapinggir kali diubengi déning tebing-tebing apik kang kabentuk amarga prosès alami. Iki sing ndadèkaké Kedhung Cinèt mèh padha kaya Grand Canyon.

Kahanan alam ing Kedhung Cinèt isih alami. Udharané lumayan seger amarga adoh saka polusi asap kendaraan utawa polusi pabrik kaya ing wilayah kutha. Akèh wit-witan réndang sing ngubengi kali. Miturut mitos, ing jaman biyèn Kedhung Cinèt asring digunakaké minangka padusan kanggo warga kerajaan nalika jaman Majapait.

Fasilitas[besut | besut sumber]

Sawisé diresmikaké minangka papan wisata, sawetara fasilitas disediakaké ing Kedhung Cinèt. Fasilitas kasebut kalebu prau dayung, spot kanggo foto-foto, lan gazébo. Prau dayung digunakaké kanggo ngiteri kali kaliyan ndeleng kaéndahan Kedhung Cinèt. Spot foto bisa digunakake kanggo njupuk gambar supaya luwih menarik lan katon apik. Déné gazébo bisa digunakaké déning pengunjung kanggo santai-santai.

Wektu mara[besut | besut sumber]

Wektu paling apik kanggo mara menyang Kedhung Cinèt yaiku nalika mangsa panas. Saliyané amarga akses menyang lokasi luwih aman lan luwih gampang, kahanan banyu ing kali uga luwih bening. Luwih becik para pengunjung ora mara nalika mangsa udan supaya bisa éntuk tampilan sing paling apik saka Kedhung Cinèt.[4]

Réferènsi[besut | besut sumber]


  1. "Pagi Menyusuri Kedung Cinet Grand Canyon Ala Jombang". Liputan 6. 2018-09-05. Retrieved 2019-11-18.
  2. Van Zuma, Ricky (2018-12-26). "Libur Panjang, Wisata Kedungcinet Plandaan Dipadati Pengunjung". Radar Jombang Jawa Pos. Retrieved 2019-11-18.
  3. Novaria, Rachmawati; Istijanto, Suko. "Optimizing the Potentional Places and Attractions of Tourist Destination". Social Sciences. 13: 1349–1354.
  4. "Kedung Cinet, Grand Canyon Tersembunyi di Jombang". Tempo.co. 2017-03-24. Retrieved 2019-11-18.