Alas Masin Cilacap
Alas Masin Cilacap iku rawa kang isiné wit-witan mangrove kira-kira ambané sepuluh hektar, kang digulawenthah déning Perum Perhutani KPH Banyumas Barat lan Dinas Kehutanan dan Perkebunan Kabupatèn Cilacap, Jawa Tengah minangka alas pangayom kéwan laut ing kawasan Sagara Anakan. Alas iku dirintis awit taun 1978 nanging tembé didadekaké alas kutha, dhedhasar Dudutan Bupati Cilacap, ing tanggal 2 Maret 2009. Alas Masin Cilacap uga didakeaé papan wisata.[1][2]
Kaanan Alas[besut | besut sumber]
Alas Masin dumunung ana ing Désa Tritih Kulon, Kacamatan Cilacap Utara, Kabupatèn Cilacap, winatesan karo sawah-sawah kagungané para warga. Saka Dalan Nusantara wis dicawisi lawang lumebu mligi kanggo para pelancong.[3][4] Ing alas iki, saiki wis katandur limalas èwu wit ya iku tancang (bruguiera gymnorrhiza), api-api (avicennia sp), bakau bandul (rhizophora mucronata) lan bakau kacangan (rhizophora apiculata). Witwitan liyané uga ana ing alas iki, antarané jeruju (acanthus ilicifolius), waru lan ketapang (terminalia catappa). Sakperangan wit-witan iku mau wujud kasilé sing katandur kanti rapet awit taun 1978. Banyu kang kanggo nguripi wit-witan ing kono saka banyu masin, Kali Lester kang langsung sesambungan karo sagara.[5] Kalestaren alas mangrove ing kéné cukup ngayomi kéwan-kéwan laut kaya déné iwak gelodok, iwak uca, urang pistol, lan iwak tanggal. Maneka warna manuk ya dhemen manggon ing pang-pang wit-witan mau.[6]
Kreteg Mesra[besut | besut sumber]
"Kreteg mesra" istilah kang asring diucapke para pelancong nalika padha rawuh ing kono, ngliwati kreteg kayu. Kasebut "kreteg mesra" jalaran mung cukup kanggo lumaku wong loro. Saumpamane pethukan, salah sijiné kudu ngalah minggir, amarga pancen ora patia jembar. Kreteg ing sadhuwuré rawa kuwi dibangun minangka fasilitas kang dicawisake déning panggulawenthah. Saben énggokan uga dibangun gubug-gubug cilik kanggo para pelancong sing péngin lèrèn, sadrema lungguh, utawa foto-foto. Ing sapinggiré Alas Masin, sawisé énték-éntékan kreteg sing dawané 300 mèter mau ana lahan cukup amba. Ing kono dicawiské aula tanpa pager kang adaté dienggo kumpul-kumpul para pelancong, pagelaran hiburan, adicara keagamaan, lan kumpulé para paneliti.
Uga delengen[besut | besut sumber]
Rujukan[besut | besut sumber]
- ↑ Situs resmi Kabupaten Cilacap, dideleng 13 Feb 2015
- ↑ National Geographic, dideleng 13 Feb 2015[pranala mati permanèn]
- ↑ Kesemat, dideleng 13 Feb 2015
- ↑ "Wisata Kompasiana, dideleng 13 Feb 2015". Diarsip saka sing asli ing 13 February 2015. Dibukak ing 21 April 2017.
- ↑ 1001 Malam, dideleng 13 Feb 2015
- ↑ Wisata Cilacap dideleng 13 Feb 2015