Garudha Senjari Putih

Garudha Senjari Putih inggih punika nama satunggaling déwa miturut naskah paringgitan Mahabharata Brantakusuman Yogyakarta ingkang ajejuluk Sang Nayakèng Rat Retnaning Bawana. Garudha Señjari Putih punika awujud peksi Garudha, kadadosan saking ari-arinipun Sang Hyang Nurcahya. Miturut naskah paringgitan Mahabharata Brantakusuman Yogyakarta, Garudha Senjari Putih punika putranipun Begawan Sangkaningrat kaliyan Bathari Winatarukma. Lampahan Garudha Señjari Putih ing naskah paringgitan Mahabharata Brantakusuman Yogyakarta punika cahcahipun wonten 7 lampahan, inggih punika:

1. Lampahan Lairipun Garudha Senjari Putih;
2. Lampahan Arga Jamurdipa
3. Lampahan Déwa Nawa Sanga
4. Lampahan Babad Wana Wiratha
5. Lampahan Babad Wana Giri Sarangan
6. Lampahan Srikandha Ratu
7. Lampahan Begawan Garudha Señjari Putih

Lampahan Lairipun Garudha Senjari Putih

Lampahan punika nyariosaken lairipun Garudha Senjari Putih ingkang kadadosanipun saking Sang Hyang Nurcahya. Kocapa, para déwa ing Kahyangan Ngajam Liman sami gègèr, amargi Begawan Sekandhadéwa tuwin rayinipun, inggih punika Nikèn Parijatha lan Nikèn Mayang Sěkar, nyuwun kanugrahan déwa ingkang awujud swarga minulya. Ingkang kaping kalih, ugi tapas Begawan Purbèngkara saking Pěrtapan Sélarěngka Lěpi, ingkang ngersakaken lenggah wonten ing Kahyangan Ngajam Liman, dados ratu ratuning para déwa saha para janma ing bawana. Bathara Guru kersa nyaosaken kanugrahan awujud swarga minulya dhumateng Begawan Sekandhadéwa tuwin rayinipun manawi Begawan Sekandhadéwa saged nyaosaken mustakanipun brahmana sakti ingkang lenggah wonten ing Pertapan Mahamèruprawata.