Casus belli

Saka Wikipédia Jawa, bauwarna bébas abasa Jawa

Casus belli iku tembung basa Latin modhèren sing tegesé "Aksi utawa insiden sing nyumet kadadéan paprangan". Casus tegesé insiden utawa kadadéan, lan belli tegesé "perang". Sanajan tembung iki kaya-kaya wis suwé dianggo amarga mawa basa Latin, ananging sajatiné lagi muncul ing pungkasan abad kaping-19, kanthi munculé dhoktrin pulitik "jus ad bellum", utawa dhoktrin ngenani perang sing sah.

Sawijining pamaréntahan sing ndhéklarasèkaké perang bakal njlèntrèhaké sebab-sebabé lan kahanan sing mbeneraké perang mau sajeroning casus belli. Kanthi ngukuhaké jalaran-jalaran sing cetha, pamaréntahan iku nuduhaké yèn perang pancèn minangka dalan pungkasan ("ultima Ratio"), lan pamaréntahan mau duwé "sebab sing bener" ("just cause") kanggo miwiti perang.

Casus belli sing bener bisa dianggo sarana supaya warga nagara ndhukung perang mau. Yèn sawijining nagara nyerang nagara liya tanpa sebab sing cetha, ana kamungkinan rakyat ora sarujuk lan nganakaké pambrontakan. Nanging ing jaman modhèren, casus belli luwih dianggo mbeneraké aksi perang tumrapé komunitas global, yaik nagara-nagara liya lan médhia.

Uga delengen[besut | besut sumber]