Budi Rahardjo

Saka Wikipédia Jawa, bauwarna mardika basa Jawa
Budi Rahardjo

Saleh Budi Rahardjo kang kondhang kanthi jeneng Budi Drive ya iku musikus kang uga dadi gitaris band Drive. Band Drive iki duwé aliran Pop Rock. Ora namung nyambut gawé dadi musikus, priya kang lair tanggal 2 Mèi 1978 iki uga nyambut gawé dadi guru musik. Dhèwèké wis tepung marang donya musik awit isih enom.[1] Dhèwèké seneng karo grup musik The Beatles, katon saka karakter musiké.[1] Ora mung iku, nalika lagi mainaké musik, dhèwèké uga ngusadani laguné karo modhèl musiké Eddie Van Hallen, kaya ta pethikan gitaré.[1] Dhèwèké uga seneng karo para musisi gedhé liyané, musisi kang nggawé musiké sugih karakter.[1]

Sawisé muputaké sekolah ing SMA 8 Jakarta, Budi nerusaké pawiyatané ing bangku kuliyah.[1] Karo sangu ngèlmu kang wis ditarima sadurungé, dhèwèké mantep anggoné lumebu jurusan Elektro Universitas Indonésia.[1] Sakaliyan ngentèkaké dina-dinané ing kampus, Budi uga isih aktif sinau babagan musik.[1]

Karir[besut | besut sumber]

Budi wis tepung babagan musik awit umur 6 taun.[1] Nalika iku dhèwèké sinau musik klasik ing Sekolah Msik YPM.[1] Uniké, piranti musik kang disinaoni déning dhèwèké dudu gitar kaya apa kang saiki dadi kalimpatané, nanging dhèwèké nyinaoni piranti musik piano.[1] Budi nembé baé nyoba sinau gitaran nalika umuré 12 taun.[1]

Nalika dhèwèké isih sekolah, aktivitas Budi uga ora adoh saka kagiyatan musik.[1] Pungkasané nalika dhèwèké kuliyah, dhèwèké lan kanca-kancané, Budi mbentuk grup musik kang dijeneng Nopelet Mumu, kang manawa diwalik bakal muni 'Telepon Umum' .[1] Band iki nyaluraké kreatifitasé karo tampil-tampil ing kafe-kafe.[1]

Budi pungkasané olèh tawa saka kakangé kanggo sériyus mbentuk band.[1] Band mau nuli dijenengi Lakuna.[1] Band ini nuli nandhatangani kontrak karo Warner Music Indonésia lan bisa ngrilis album 525862 taun 2000, karo hit single'é kang judhulé Sesuatu (tembangan iki digunakaké dadi Soundtrack Film 9 NAGA).[1]

Nanging amarga béda visi, sang vokalis nuli mutusaké kanggo metu lan dadi manajer Dewi Sandra.[1] Jeneng Lakuna diganti dadi Flow.[1] Tahun 2001, Budi dadi guru gitar klasik ing panggonané mbiyèn sinau musik, YPM.[1] Tahun 2004 Budi nggabung karo Erwin Gutawa Band dadi gitaris, nggantèkaké posisi Eddie Kemput kang metu.[1] Budi uga kerep dadi pengiring Krisdayanti, Siti Nurhaliza, 3 Diva, lan penyanyi-penyanyi kondhang liyané.[1] Dhèwèké kang wiwit kondhang, pungkasané dijaluki tulung déning Piyu Padi kanggo mbentuk band anyaran kang dijenengi Drive.[1] Kagiyatan liyané iku ora mung dadi guru musik, dhèwèké iku uga gawé ilustrasi musik sinétron lan liyané.[1]

Dhèwèké duwé anak kang dijenengi Dili. Bocah kang duwé bakat seni kaya dhèwèké.[2] Nanging dhèwèké sempet duwé pangarep-arep supaya anaké ora dadi musisi, amarga uripé ora tenang.[2] Nanging kalimpatan anaké ing donya musik malah nambah.[2]

Cathetan suku[besut | besut sumber]

  1. a b c d e f g h i j k l m n o p q r s t u v w x biografi Budi Rahardjo dipununduh tanggal 24 September 2011
  2. a b c berita Budi Rahardjo dipununduh tanggal 24 September 2011