Ampilan dalem

Ampilan dalem inggih punika lambang karajan mliginipun wonten Karaton Kasunanan Surakarta Adiningrat ugi wonten ing Kraton Yogyakarta. Lambang punika awujud barang-barang ingkang asring dipunmedalaken nalika upacara resmi ndhèrèk Sultan. Barang-barang punika saking emas murni kanthi tahta berlian. Padatanipun dipunasta kaliyan 8 abdidalem wanita ingkang dipunarani Manggung ingkang piyambak-piyambak ngasta barang ingkang awujud:

1. Banyak utawi angsa: simbol kasucian lan waspada.
2. Dhalang utawi kijang: simbol gesit lan kawicaksanaan.
3. Sawung utawi pitik jago: simbol kawantunan.
4. Galing utawi merak: simbol kawibawan.
5. Hardawalika utawi naga: wonten ing mitologi Jawi ateges panyangga donya. Dados ateges Raja punika nyangga sadaya tanggel jawab.
6. Kacu mas utawi saputangan emas: simbol ingkang ngapus sadaya kotoran jasmani lan rohani wonten ing papréntahan ugi wonten ing katatanagaraan.
7. Kutuk utawi Kotak: simbol daya tarik.
8. Kandhil utawi lentera: simbol panerangan manahing rakyat.