John Latham (ornithologis)

John Latham punika satunggiling pangarang buku, naturalis lan satunggiling dhokter kanthi kabangsan Inggris ingkang dipunwiyosaken tanggal 27 Juni 1740 ing kitha Eltham, Kent.

Latham ugi dipunjuluki minangka "éyang" saking èlmu peksi Australia. Panjenenganipun gadhah kesempatan nliti lan maringi nama spésimèn peksi-peksi Australia laminipun kalih dasa taun ing akir abad kaping 18.

John Latham nglampahi praktèk kadhokteran ing kitha Dartford, Kent. Panjenenganipun pensiun taun 1796 lan netep ing Hampshire, Inggris. Asil karya utamanipun inggih punika A General Synopsis of Birds ingkang dipundamel antawis taun 1781 dumugi taun 1801 lan General History of Birds ingkang dipundamel antawis taun 1821 dumugi taun 1828.

A General Synopsis of Birds wujud satunggiling buku John Latham ingkang sepindhah ing babagan kawruh prakawis peksi, ingkang isinipun kalebet 106 gambar peksi ingkang dipundamel déning Latham piyambak. Ing salebeting buku puniki ugi wonten dhèskripsi saking kathah spésies énggal ingkang pinanggih déning Latham ing manéka musiyum lan kolèksi. Nanging Latham boten maringaken nama èlmiah saking spésies-spésies wau. Ing taun 1790, Latham nerbitaken Index Ornithologicus ing pundi panjenenganipun maringaken nama èlmiah spésies-spésies ingkang dipundhèskripsikaken ing salebeting buku sadèrèngipun. Nanging émanipun, buku Latham puniki dipundhisiki déning Johann Friedrich Gmelin, ingkang ugi nerbitaken vèrsi sanès saking Systema Naturae anggitanipun Carolus Linnaeus, ing pundi Gmelin maringaken nama èlmiah spésies-spésies ingkang dipundhèskripsikaken déning Latham. Miturut angger-angger panamian tatanami biologi, nama spésies ingkang dipunparingaken Gmelin langkung gadhah prioritas.

John Latham silih korèspondhènsi kanthi teratur kaliyan Thomas Pennant, Joseph Banks, Ashton Lever lan èlmuwan-èlmuwan sanèsipun. Panjenenganipun dados anggota Royal Society taun 1775 lan tumut mundhut pérangan salebeting pambentukan Linnean Society.

John Latham tilar donya tanggal 4 Fèbruari 1837.

Réferènsi[besut | besut sumber]

Christine E. Jackson-Bird Etchings: The Illustrators and Their Books, 1655-1855 ISBN 0801496845