John Latham (ornithologis)

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
John Latham

John Latham punika satunggiling pangarang buku, naturalis lan satunggiling dokter kanthi kabangsan Inggris ingkang dipunwiyosaken tanggal 27 Juni 1740 ing kitha Eltham, Kent.

Latham ugi dipunjuluki minangka "éyang" saking èlmu peksi Australia. Panjenenganipun kagungan kesempatan nliti lan maringi nami spesimen peksi-peksi Australia laminipun kalih dasa taun ing akir abad kaping 18.

John Latham nglampahi praktèk kadhokteran ing kitha Dartford, Kent. Panjenenganipun pensiun taun 1796 lan netep ing Hampshire, Inggris. Asil karya utamanipun inggih punika A General Synopsis of Birds ingkang dipundamel antawis taun 1781 dumugi taun 1801 lan General History of Birds ingkang dipundamel antawis taun 1821 dumugi taun 1828.

A General Synopsis of Birds arupi satunggiling buku John Latham ingkang sepindhah ing bidang kawruh perkawis peksi, ingkang isinipun kalebet 106 gambar peksi ingkang dipundamel déning Latham piyambak. Ing salebeting buku puniki ugi wonten dhèskripsi saking kathah spesies énggal ingkang dipuntemokaken déning Latham ing manéka muséum lan kolèksi. Nanging Latham boten maringaken nami èlmiah saking spesies-spesies kasebat. Ing taun 1790, Latham nerbitaken Index Ornithologicus ing pundi panjenenganipun maringaken nami èlmiah spesies-spesies ingkang dipundhèskripsikaken ing salebeting buku sadèrèngipun. Nanging émanipun, buku Latham puniki dipundhisiki déning Johann Friedrich Gmelin, ingkang ugi nerbitaken vèrsi sanès saking Systema Naturae anggitanipun Carolus Linnaeus, ing pundi Gmelin maringaken nami èlmiah spesies-spesies ingkang dipundhèskripsikaken déning Latham. Miturut angger-angger panamian tatanami biologi, nami spesies ingkang dipunparingaken Gmelin langkung kagungan prioritas.

John Latham silih korèspondhènsi secara teratur kaliyan Thomas Pennant, Joseph Banks, Ashton Lever lan èlmuwan-èlmuwan sanèsipun. Panjenenganipun dados anggota Royal Society taun 1775 lan tumut mundhut bagéan salebeting pambentukan Linnean Society.

John Latham tilar donya tanggal 4 Februari 1837.

Réferènsi[sunting | sunting sumber]

  • Christine E. Jackson - Bird Etchings: The Illustrators and Their Books, 1655-1855 ISBN 0801496845