Islamabad

Saka Wikipédia, Ènsiklopédhi Bébas ing basa Jawa / Saking Wikipédia, Bauwarna Mardika mawi basa Jawi

Islamabad (Basa Urdu: اسلام آباد tegesé "Kutha Islam") iku ibu kutha Pakistan. Kutha iki papané ana ing dhataran dhuwur Potohar ing sisih lor-kulon negara iki. Minangka administrative, kutha iki papané ana ing Islamabad Capital Territory utawa "Dhaérah Ibu Kutha Islamabad". Nanging minangka historis, kutha iki bagéyan saka provinsi North-West Frontier lan tlatah Punjab. Islamabad iku kutha sing rélatif anom umuré. Kutha iki binangun ing taun 1960-an kanggo ngganti Karachi sing wis dadi ibu kutha Pakistan wiwit taun 1947. Banjur ing taun 1958, ibu kutha dipindhah ing Rawalpindi sing lokasiné cedhak karo Islamabad lan resmi ing taun 1960, Islamabad dadi ibu kutha Pakistan. Islamabad ing taun 1998 nduwé pedunung 805.235 jiwa. Salah siji obyek wisata sing wigati lan misuwur iku Mesjid Faisal sing disumbang déning Raja Faisal saka Arab Saudi.

[sunting] Sejarah cekak

Senadyan lagi dibangun ing dasawarsa 1960-an, nanging Islamabad iku papané ana ing tlatah historis ing Pakistan. Ing sisih kulon ana kutha kuna Taxila utawa ing basa Sangskreta Takṣaśila. Saliyané iku tlatah iki papané cedhak karo gapura mlebuné para bangsa ngamanca ing Tanah India.

[sunting] Ngalih ibu kutha

Ing pungkasané dasawarsa 1950-an ana rencana mindhahaké ibu kutha saka Karachi ing pesisir menyang kutha anyar sing diarani Islamabad amerga presiden Pakistan kala iku, Ayub Khan nduwèni kekarep supaya pembangunan negara ora namung dipunjeraké ing Karachi waé. Saliyané iku uga ana alesan stratégis, Karachi iku ora gampang dibéla yèn ana perang karo India. Amerga papané ana ing pesisir lan gampang direbut. Béda karo Islamabad sing papané direksa gunung-gunung. Banjur Islamabad papané cedhak karo Markas Besar Angkatan Bersenjata Pakistan ing Rawalpindi. Alesan liyané iku iklim temperatur ing Islamabad luwih kepénak.

Banjur ing taun 1960-an dibangun kutha anyar déning perusahaan arsitektur Yunani Doxiadis Associates. Perusahaan iki banjur ngrancang rencana indhuk kutha sing wujudé segitiga lan binagi sistem kothak-kothak kang pucuké manuju wukir Margalla.

Saiki Islamabad béda karo kutha-kutha liyané ing Pakistan. Organisasiné apik tur rapi. Banjur kutha iki luwih éndhah lan resik tinimbang kutha-kutha liyané.