Ali Moertopo

Ali Moertopo
Mantri Komunikasi lan Informatika Républik Indonésia 21
Linggih 29 Maret 1978 – 19 Maret 1983
Présidhèn	Soeharto
Kang sadurungé	Mashuri Saleh
Kang sawisé	Harmoko
Rerincèn dhiri
Lair	(1924-09-23)23 Sèptèmber 1924 Blora, Jawa Tengah,Hindia Nèderlan
Pati	Mèi 15, 1984(1984-05-15) (umur 59) Jakarta,Indonésia
Agama	Islam

Letnan Jenderal (Purn.) Ali Moertopo, utawa asring uga dieja Ali Murtopo (Blora, Jawa Tengah, 23 September 1924 – 15 Mèi 1984), iku nama sawijining pemikir, tokoh intèlijen, lan pulitikus kang duwé peran wigati mligi wektu jaman Orde Baru ing Indonésia. Panjenengané naté mengku kalungguhan minangka Mantri Penerangan Indonésia (1978 – 1983) sarta Deputi Kepala (1969 – 1974) lan Wakil Kepala (1974 – 1978) Badan Koordinasi Intelijen Nagara.

Awal karir

Ali nggabung BKR sawisé Kamerdhikan Indonésia diproklamiraké ana ing taun 1945. Ana ing dasawarsa 1950-an, Ali Murtopo ditugasaké ing Kodam Diponegoro. Wiwitané, dhèwèkné minangka bagèan saka wadyabala Banteng Raider. Pasukan iki, kang ana ing sakngisoré komando Ahmad Yani, minangka sawijining wadyabala mirunggan kang disiapaké kanggo numpas pemberontakan Darul Islam. Ana ing taun 1956, bebarengan karo Yoga Sugama, Ali njurung Letnan Kolonel Soeharto sajeroning upaya kanggo mengku kalungguhan minangka Pangdam Diponegoro. Manuver iki bisa kasil lan Soeharto sukses olèh kalungguhan Pangdam Diponegoro kanthi pangkat kolonel. Minangka imbalané, Ali dipatah déning Soeharto dadi Asisten Teritorial.

Wektu iku, Républik Indonésia lagi ngadhepi obahan koreksi laladan liwat obahan PRRI saéngga akèh wadyabala-wadyabala ABRI kang dikirim menyang Sumatra kanggo nanggulangi obahan iki. Ali dikirim menyang Sumatra taun 1959 lan dhèwèkné njabat dadi Kepala Staf Resimen II lan Yoga Sugama minangka Komandan Resimenné. Ing sajeroning taun iku mau uga, Soeharto dicopot saka kalungguhan Pangdam déning KSAD AH Nasution amarga katut kasus penyelundupan lan ditugasaké sinau ing SSKAD ana ing taun 1960. Sawisé PRRI dikalahaké, Ali bali menyang Jawa Tengah kanggo nerusaké tugas ing Kodam Diponegoro kang wektu iku dibawahi Pranoto Reksosamudro.

Sawisé Soeharto ngrampungaké sinau ing SSKAD, dhèwèké ditarik menyang Jakarta lan mengku kalungguhan minangka Deputi I KSAD (Operasi). Wektu iku, Ali nggabung manèh karo nduwurané kang lawas iku. Sakbanjuré Soeharto dipercaya déning Nasution supaya mbentuk CADUAD (Cadangan Umum Angkatan Darat) lan sawisé ékan tempur mau diwangun, Soeharto ditunjuk minangka Panglima CADUAD kanthi pangkat Brigadir Jenderal. Sepisan manèh, Ali dadi bawahané Soeharto ya iku minangka Asisten Kepala Staf CADUAD.

Orde Baru

Ali nduwé peran wigati sajeroning upaya modernisasi intelejen Indonésia. Dhèwèké mèlu ing operasi-operasi intelejen kanthi jeneng Operasi Khusus (Opsus) kang mligi ditujokaké kanggo mberangus lawan-lawan pulitik papréntahan Soeharto.

Ana ing taun 1968, Ali nggagas peleburan parté-parté pulitik, kang wektu ikuakèh banget cacahé, dadi sawatara parté waé supaya luwih gampang dikendalèkaké. Bab iki mau tembé mburi mawujud ing taun 1973 nalika kabèh parté lebur dadi telung parté: Golkar, PPP (Penggabungan parté-parté berbasis Islam), lan PDI (Penggabungan parté-parté berbasis nasionalis).

Ana ing taun 1971, bebarengan karo Soedjono Hoemardhani, asisten pribadi Soeharto, dhewèké merintis ngadegké CSIS (Centre for Strategic and International Studies) kang dadi lembaga panalitèn kawicaksanan papréntahan. Taun 1972, Ali nerbitaké tulisan Dasar-dhasar Pemikiran tentang Akselerasi Modernisasi Pembangunan 25 Tahun kang sabanjuré ditampa déning MPR minangka strategi Pembangunan Jangka Panjang (PJP).

Rujukan

• Floriberta Aning S., 100 Tokoh yang Mengubah Indonésia (2005)

Pranala njaba

• Ali Moertopo dan Dunia Intelijen Archived 2007-05-25 at the Wayback Machine.