Vivian Hsu

Vivian Hsu (Tradisional: 徐若瑄; Pinyin: Xú Ruòxuān; Wade–Giles: Hsu Jo-hsüan; Pe̍h-ōe-jī: Chhî Jio̍k-soan; Jepang: ビビアン・スー Bibian Sū 19 Maret 1975) iku sawijining penyanyi, artis lan fotomodèl Taiwan. Vivian dadi kawentar ing Jepang, ing kana dhèwèké muncul wiwit ing taun 1995 lan banjur dadi sèlèbriti sing misuwur lan ditepungi akèh wong ing pungkasaning dasawarsa 1990-an.

Dhèwèké uga tau dadi vokalis Black Biscuits, sawijining band Jepang sing tau ngrilis patang single, "Stamina", "Timing", "Relax", "Bye-Bye", lan album siji, Life. Single papat iki bisa tekan top 5 undhak-undhakan Oricon singles chart, lan Life bisa tekan #6 ing undhak-undhakan album.

Babad slira

Vivian iku anak kapindho, bapakné iku wong Taiwan Tyonghowa, kamangka ibuné iku Wong Atayal, sawijining bangsa pribumi Taiwan. Vivian Hsu nalika cilik nganggo jeneng resmi Hsu Su-chuan (Mandarin: 徐淑娟; pinyin: Xú Shújuān) nganti awaké miwiti karir minangka modèl. Wong tuwané pegatan nalika Vivian isih cilik. Dhèwèké sekolah ing sekolah dhasar Taipei Jianxing lan SMP Taipei Shulinguo.

Karir

Kariré Vivian ing donya panglipur diwiwiti sawisé menang kontès "Bocah Wadon Ayu sing nduwé Bakat" lan dianakaké déning CTS Taiwan ing taun 1990. Nalika iku dhèwèké nyambut gawé ider panganan nganggo pit lan para langganané padha weruh yèn dhèwèké lumebu tivi.