Theresa May

Saka Wikipédia Jawa, bauwarna mardika basa Jawa
Theresa May

Theresa Mary May (lair mawa jeneng famili Brasier; lair tanggal 1 Oktober 1956) iku sawijining juru pulitik Britania sing diangkat dadi Mahamantri Britania lan pangulu Paré Konservatif wiwit sasi Juli 2016 lan wis dadi anggota parlemèn (Member of Parliament (MP) Britania kanggo distrik pamilih konstituènsi Maidenhead wiwit taun 1997.

Saka taun 1977 nganti 1983, May nyambut gawé ing Bank of England, lan wiwit 1985 nganti 1997 ing Association for Payment Clearing Services, kamangka dhèwèké uga ngabdi minangka anggota rad ing London Borough of Merton's Durnsford Ward. Sawisé ora bisa kapilih dadi anggota parlemèn ing taun 1992 lan 1994, wusanané dhèwèk'kapilih ing taun 1997 minangka anggota parlemèn kanggo distrik Maidenhead. May banjur njabat minangka anggota kabinèt bayangan William Hague, Iain Duncan Smith, Michael Howard, lan David Cameron, kalebu minangka pamimpin bayangan parlemèn lan dadi mantri bayangan urusan lapangan kerja lan pengsiyun. Dhèwèké uga tau njabat dadi pangulu Parté Konservatif saka taun 2002 nganti 2003.

Sawisé koalisi kabinèt diformasi ing taun 2010, May diangkat dadi Mantri Dalam Negeri lan Mantri Urusan Wanita lan Emansipasi. Ing taun 2012, May mundhur saka kalungguhan kapindho iki. Sawisé Parté Konservatif menang pilihan umum 2015, May diangkat manèh dadi Mantri Dalam Negeri lan dadi Mantri Dalam Negeri sing mangsa jabatané suwé dhéwé sajeroning 60 taun sawisé James Chuter Ede. May banjur ngréformasi kapulisèn, sangsaya puguh nglawan narkoba lan ngwatesi imigrasi.

Sawisé David Cameron mundhur lèngsèr amarga olèhé nganakaké réferèndum kalah ing tanggal 24 Juni 2016, May nyalonaké awaké dhéwé minangka pangulu Parté Konservatif. Wusanané dhèwèké menang ing surya 11 Juli 2016 lan diangkat rong dina sawisé ing surya 13 Juli 2016.

Theresa May iku Mahamantri Britania wadon kapindho sawisé Margaret Thatcher. Kabeneran May ya padha saka Parté Konservatif. May iku nganggep awaké minangka Wong Konservatif Tunggal Bangsa (One Nation Conservative) lan wateké iku liberal konservatif.