Raden Gotama
 | Artikel iki tanpa rujukan sing mitayani mula isèné ora bisa divèrifikasi. Sampéyan bisa mbiyantu  kanthi nambah rujukan sing trep.Artikel sing ora bisa divèrifikasi bisa dibusak kapan waé déning panata. |
Raden Gotama iku putra mbarepe Prabu Heriya ing Maespati. Wenang jumeneng ratu ing Maespati, nglintir keprabone ingkang rama. Nanging, Raden Gotama ora seneng marang gebyaring bandha donya. Manut panemune, barang kadonyan iku bisa nyababake tumindak nistha sarta owel ing pati. Mula, sing tansah diudi rina klawan wengine mung tumindak becik, manut tuntunaning agama, murih patine ing besuke bisa lumebu swarga. Ora mokal yen Raden Gotama luwih remen nilar praja, nengenake ngangsu kawruh lair batin marang para pandhita.
Sawijining dina, nalika manjing alas gung liwang liwung, ketemu Dewi Windradi kang njaluk tulung supaya diayomi. Dewi Windradi nuli nyritakake lelakone. Kawiwitan saka kahyangan kunggahan parangmuka saka negara Cempa. Prabu Gajendramuka narendra ing Cempa nglamar Dewi Windradi. Amarga panglamare ditampik, dadi campuh perang. Para dewa kalah perange. Bathara Guru dhawuh supaya nggawe karti sampeka. Dewi Windradi kedhawuhan gelem diboyong ing Cempa, nanging satekane ing negara Cempa kadhawuhan njaluk bebana sing angel panggayuhe, sing bisa dadi jalaran sirnane Prabu Gajendramuka. Klakon Sang Dewi diboyong menyang Cempa, nuli darbe panyuwun supaya kadhaton Cempa ditretes inten berlean sing asale saka telenging samodra. Yen Prabu Gajendramuka ora bisa minangkani, Sang Dewi ora sudi ngladeni. Prabu Gajendramuka nyaguhi, banjur ninggalake tamansari Cempa. Sapungkure Prabu Gajendramuka, Dewi Windradi lolos saka praja, nganti kepanggih Raden Gotama ing tengah alas. Sang Dewi nyuwun pengayoman. Yen Raden Gotama bisa mateni Prabu Gajendramuka, bakal disuwitani salawase urip.
Raden Gotama saguh nyirnakake Prabu Gajendramuka. Nuli bebarengan tumuju kedhaton Cempa. Durung nganti adoh lakune saka alas, kapapag Prabu Gajendramuka lan patihe. Sulayaning rembug, dadi pancakara rame. Saben ratune mati dipanah, dilumpati patihe, bali urip maneh. Kaya ngono kuwi terus-terusan, nganti Raden Gotama kentekan daya.
Kacarita Bathara Surya kang dening Bathara Guru kadhawuhan ngawat-awati Dewi Windradi, malah kasmaran marang Sang Dewi. Sigra memba warna Raden Gotama, manggihi Dewi Windradi. Ngendika yen Prabu Gajendramuka wis sirna, banjur nyuwun diladeni Dewi Windradi. Rampung saresmi, Raden Gotama palsu maringi bebungah wujud cupu kang endah banget, jenenge Cupu Manik Asthagina.
"Sangertos kula, ingkang kagungan cupu Manik Asthagina punika namung dewa ing kahyangan. Aja-aja apa kakang Bathara Surya?" ucape Dewi Windradi.
Sanalika badhar sejatining wujud, "O Windradi, awit mung nuruti hardaning nafsu, satemah lali samubarang. Wis, gage simpenen cupu iku, aja nganti weruh Gotama."
Wasanane, Prabu Gajendramuka lan patihe bisa disirnakake dening Raden Gotama srana dipanah bareng. Kaelokane kuwandhane Prabu Gajendramuka salah kedaden dadi reca gajah, ngongkang ing pinggiring Bengawan Gangga. Ora let suwe, Bathara Narada tumurun ing marcapada. Nelakake agunging panuwun dene Gotama bisa mateni mungsuh kahyangan, sarta masrahake Dewi Windradi marang Raden Gotama. Kajaba iku, paring dhawuh supaya Gotama gelem jumeneng ratu ing Cempa. Gotama ora kersa. Negara Cempa sing komplang, nuli katutup klamaring jagad dening Gotama. Ing tembe bakal bisa binuka dening satriya watak pandhita. Kadhaton Cempa disalini jeneng Gajahoya.
Sumber
[besut | besut sumber]- Mulyantoro, Majalah Jaka Lodhang