Punthuk Bégo

Saka Wikipédia Jawa, bauwarna mardika basa Jawa
Punthuk Bégo
ꦥꦸꦤ꧀ꦛꦸꦏ꧀ꦧꦺꦒꦺꦴ
JinisPapan wisata alam
PapanDalan Imagiri–Dlingo, Dhusun Kedhung Buweng, Désa Wukirsari, Kapanéwon Imagiri, Kabupatèn Bantul, Propinsi Dhaérah Istiméwa Ngayogyakarta
Koordinat7°55′33″S 110°24′12″E / 7.925729°S 110.403209°E / -7.925729; 110.403209
Dibuka
  • 2010 (kira-kira)
  • 2019 (wiwitan kondhang)
Kang ngrumatDhinas Pariwisata Kabupatèn Bantul
StatusDibukak (saben dina)
Sarana
  • Parkir
  • Papan motocross
  • Warung panganan
  • Cakruk
  • Kakus

Punthuk Bégo (Carakan: ꦥꦸꦤ꧀ꦛꦸꦏ꧀ꦧꦺꦒꦺꦴ; basa Indhonésia: Bukit Bego) utawa Punthuk Kedhung Buweng ya iku papan wisata kang awujud turahan proyèk dhudhukan palemahan kang papané ana ing Dalan Imagiri–Dlingo, Dhusun Kedhung Buweng, Désa Wukirsari, Kapanéwon Imagiri, Kabupatèn Bantul, Propinsi Dhaérah Istiméwa Ngayogyakarta. Punthuk iki kondhang ing Kabupatèn Bantul amarga kerep ditekani nom-noman kang karem poto-poto lan wong-wong ngepit kanggo lèrèn. Jeneng papan iku dijupuk saka èkskavator (bebrayan sakiwa-tengené ngarani kanthi jeneng bégo utawa béko) kanggo dhudhuk lemah.

Mula bukané[besut | besut sumber]

Jeneng punthuk iki dijupuk saka èkskavator (kerep diarani bégo utawa béko) kanggo dhudhuk lemah.[1] Jeneng kuwi pancèn rada nylenèh, amarga tembung “bégo” nuduhaké tembung kang ala, ya iku bodho.[2][3] Bebrayan ing sakiwa-tengené uga ngarani punthuk iku kanthi jeneng Punthuk Kedhung Buweng amarga mapan ing Dhusun Kedhung Buweng.[4][5]

Wondéné iku, lemah kang ndadèkaké punthuk kasebut asalé saka tilas klumpukan proyèk dhudhukan palemahan Dalan Imagiri–Dlingo.[2] Dhudhukan lemah ing papan iki disik kanggo ngurug pomahan lan gedhong-gedhong. Bab kuwi sing dadi sabab dhuwuré luwih cendhèk tinimbang sadurungé.[4][6][7]

Panggonan[besut | besut sumber]

Punthuk Bégo ana ing sisih wétan Kapanéwon Imagiri, kurang luwih telung kilomèter saka Kebon Buwah Mangunan. Punthuk iki uga cédhak karo Watu Goyang lan Pinus Mangunan.[4] Punthuk kasebut ana ing dalan sesambungan Kapanéwon Imagiri lan Kapanéwon Dlingo, peneré ing Dalan Imagiri–Dlingo km. 2.5, Dhusun Kedhung Buweng, Désa Wukirsari, Kapanéwon Imagiri, Kabupatèn Bantul, Dhaérah Istiméwa Ngayogyakarta.[1][8] Dalan mlebu menyang punthuk iki bisa nganggo tunggangan rodha papat utawa loro.[4]

Kahanan[besut | besut sumber]

Papan wisata iki nduwèni amba kurang luwih 1,2 héktar, déné ancangan kapisan lemah kang bakal dijupuk kanggo urug ya iku 2 héktar.[9] Sadurungé kondhang, papan iku amung dianggo nyawang kaéndahan alam sakiwa-tengené saka pucaké, uga kerep ditekani bebrayan kang plesir kanggo lèrèn lan poto-poto. Papan kasebut samsaya kondhang dadi papan wisata wiwit ditinggal juru pelikan lan dianggo lèrèn wong-wong ngepit.[8]

Punthuk iku duwé pucak kang diarani Watu Balung. Salah siji tenger saka punthuk kasebut ya iku wujudé kaya ta lemah kang dikethok lan ana patung Semar ing ndhuwuré. Papan wisata iki pisanan amung punthuk garing tilas proyèk dhudhukan palemahan, kang idiné dicopot déning papréntahan dhaérah amarga disumelangi ngrusak wewengkon sakiwa-tengené. Punthuk kasebut saiki diupakara dadi papan wisata alam kang ana ing pinggir dalan sambungan Kapanéwon Imagiri lan Kapanéwon Dlingo.[4][10] Sarana ing papan iki rada apik, déné durung diupakara sakabèhé déning papréntahan dhaérah, ya iku ana parkir, cakruk, lan kakus.[4][9]

Ing dina-dina tinamtu, punthuk iki kerep dianggo minangka papan gladhèn klumpukan montor tril. Kasdi, salah siji warga ing papan kasebut, njlèntrèhaké yèn punthuk iku dianggo montor tril amarga lemahé dhuwur lan akèh watuné.[2][8] Papan wisata iki uga nyepaki palungguhan kanggo nyawang kaéndahan alam sakiwa-tengené ing pucaké.[2] Saliyané iku, saka pucaké uga bisa didelok Makam Imagiri lan Masjid Pajimatan Imagiri.[6] Nganti taun 2020, kanggo nekani punthuk ing tlatah Mangunan iki durung dijupuk tarikan karcis, nanging mung parkir montor lan mobil.[1]

Gladri[besut | besut sumber]

  • Tetenger Punthuk Bégo saka uwuh gendul plastik.
    Tetenger Punthuk Bégo saka uwuh gendul plastik.
  • Patung Semar kang dadi tetenger Punthuk Bégo.
    Patung Semar kang dadi tetenger Punthuk Bégo.
  • Papan motocross ing Punthuk Bégo.
    Papan motocross ing Punthuk Bégo.
  • Dalan Imagiri–Dlingo saka pucak Punthuk Bégo.
    Dalan Imagiri–Dlingo saka pucak Punthuk Bégo.

Uga delengen[besut | besut sumber]

Rujukan[besut | besut sumber]

  1. ↑ a b c Ardiansjah, Noer (14 Novèmber 2016). "Menikmati Indahnya Yogyakarta dari Bukit Bego Imogiri". Merah Putih. Dibukak ing 14 Agustus 2020.
  2. ↑ a b c d Inasis, Gitario Vista (4 Juli 2020). "Green Kenyot Hingga Bukit Bego, Ini Nama Tujuh Tempat Wisata Terunik di Indonesia". Kumparan Travel. Dibukak ing 14 Agustus 2020.
  3. ↑ Ratnasari, Bella Cynthia (15 Juni 2019). "Lima Destinasi Wisata yang Punya Nama Unik di Indonesia". Kumparan Travel. Dibukak ing 14 Agustus 2020.
  4. ↑ a b c d e f Tempat Wisata Seru (17 Novèmber 2021). "Bukit Bego Imogiri: Tempat Wisata Hits di Bantul". Tempat Wisata Seru. Dibukak ing 14 Agustus 2020.
  5. ↑ Pemerintah Kabupaten Bantul (17 Novèmber 2021). "Bukit Bego". Bantulpedia. Diarsip saka sing asli ing 2023-09-28. Dibukak ing 21 Januari 2022.
  6. ↑ a b Eksotis Jogja (19 Sèptèmber 2016). "Berburu Sunset di Bukit Bego Imogiri, Bantul". Eksotis Jogja. Diarsip saka sing asli ing 2020-08-11. Dibukak ing 14 Agustus 2020.
  7. ↑ Viva (20 Sèptèmber 2016). "Berburu Sunset di Bukit Bego Imogiri Yogyakarta". Viva. Dibukak ing 14 Agustus 2020.
  8. ↑ a b c Agustina, Sinta (13 Maret 2017). "Bukit Bego – Melihat Kota Jogja dari Ketinggian Imogiri, Tiap Sore Bisa Main Motor Trail". Tribun Travel. Dibukak ing 14 Agustus 2020.
  9. ↑ a b Nugroho, Adi (12 Maret 2021). "Destinasti Objek Wisata Bukit Bego di Imogiri Bantul Yogyakarta". I Hate Green Jello. Diarsip saka sing asli ing 2023-06-05. Dibukak ing 14 Agustus 2020.
  10. ↑ Good Times (10 Dhésèmber 2019). "Wisata Alam ke Bukit Bego Imogiri Bantul, Yogyakarta". Good Times. Diarsip saka sing asli ing 2020-08-11. Dibukak ing 14 Agustus 2020.

Pranala jaba[besut | besut sumber]

Wikimedia Commons duwé médhia ngenani Punthuk Bégo.
Dijupuk saka "https://jv.wikipedia.org/w/index.php?title=Punthuk_Bégo&oldid=1670495"