Penisilin

Saka Wikipédia Jawa, bauwarna bébas abasa Jawa
Inti Penisilin
Penisilin ing jeruk mandarin

Penisilin (Inggris:Penicillin utawa PCN) ya iku salah sawijiné kalompok antibiotika β-laktam kang minangka nambani penyakit infeksi kang disebabaké amarga bakteri, biyasané duwé jinis Gram positif.[1]

Jeneng Penisilin uga kena kanggo nerangaké anggota kalompok penisilin kang luwih spesifik.[1] Kabéh penisilin nduwé dhasar rangka kang diarani Penam kang duwé rumus molekul R-C9H11N2O4S, ing ngendi R ya iku rangka samping kang werna-werna.[1]

Nalika Perang Dunia II, penisilin diwénéhaké kanggo amputasi wadyabala sekuthu, lan bisa nylametake 12-15% nyawa.[2] Nalika iku, penisilin isih winates cacahé awit angèl kanggo digawé kanthi cara masal.[2] Nalika semana penisilin diklumpukaké saka banyu uyuh pasien lan dianggo manéh.[2]

Struktur kimiawi penisilin dingerteni karo Dorothy Crowfoot Hodgkin nalika wiwitan taun 1940an.[2] Penemuan iki ndadèkaké penisilin kena digawé kanthi cara sintetik.[2] Salah sijiné tim saka Oxford nemu metode produksi massal penisilin.[2] Tim kang dipimpin Howard Walter Florey iki éntuk Bebungah Nobèl ing babagan Kedhokteran utawa Fisiologi nalika taun 1945.[2] Nalika iku penisilin dadi antibiotika kang akèh dianggo kanggo infeksi bakteri Gram positif.[2]

Penisilin banjur dikembangaké dadi ampisilin, kang duwé kagunan kang luwih tinimbang penisilin asli.[2] Sawisé iku banjur diasilaké penisilin kang bisa nahan enzim beta-laktamase kalebu flukloksasilin, dikloksasilin, lan metisilin.[2] Penemuan iki penting banget amarga bisa matèni spésies bakteria kang duwé beta-laktamase, ananging ora bisa maténi strain Staphylococcus aureus kang tahan metisilin.[2]

Cathetan suku[besut | besut sumber]

  1. ^ a b c [Martinko JM, Dunlap PV, Clark DP. edisi 12.Brock Biology of Microorganisms. San Francisco:Pearson Benjamin Cummings.hlm. 795.isbn=9780321536150]
  2. ^ a b c d e f g h i j k [Silverthorn, DU. 2004. Human physiology: an integrated approach.Pearson Education.ISBN 0-8053-5957-5]