Serat Jayèngbaya

Samak buku Serat Jayengbaya anggitan R.Ng.Ranggawarsita

Serat Jayengbaya iku buku pituduh / falsafah urip kang dianggit déning R. Ngabehi Ranggawarsita lan diterbitaké déning Balai Pustaka Jakarta, cithakan kapisan taun 1988 kanthi alih basa lan alih aksara déning L. Mardiwarsito. Buku iki dianggit déning R. Ngabehi Ranggawarsita wektu panjenengané isih umur antara 20 nganti 28 taun, ya iku nalika mengku jabatan carik Kadipaten Anom ing Kasunanan Surakarta, kanthi asma sebutan Mas Ngabèhi Sarataka.

Buku serat kang dumadi saka 250 pada iki nyaritakaké tokoh Jayengbaya kang kepingin nggolèki kabagjan urip kanthi cara nglaksanakaké tugas sacara apik, golèk jabatan dhuwur, lan kalungguhan kang kinurmatan. Jroning upayané iku, 47 cara kauripan wis dicoba, nanging ora ana siji-sijia kang cocog, amarga saben cara mau tansah ngadhut kakurangan-kakurangan lan ora ana siji-sijia kang sampurna. Pungkasané, Jayengbaya mutusaké bakal nekuni cara kauripané kang wis biasa, amarga iku kang dianggep paling apik.

Cuplikan tembang

Asmaradana (pada 1):

Kidung kadresaning kapti

Yayah nglamong tanpa mangsa

Hingan silarja jatine

Satata samaptaptinya

Raket rakiting ruksa

Tahan tumaneming siku

Karasuk sakeh kasrakat.

Tegesé

Sacara umum tembang mau bisa diterjemahaké ing ngisor iki:

Iki tembang bab katabahan ati

Kaya-kaya ngocèh tanpa kendhat

Tanpa kenal wates kasusilan lan kaslametan,

Amarga saka iku kita kudu tansah waspada

jroning ngadhepi hukum alam

lan kuwat ngendhalèkaké émosi

lan ngadhepi kasangsaran.

Rujukan

• Serat Jayengbaya, R. Ng. Ranggawarsita, alihbasa L. Mardiwarsito, Balai Pustaka Jakarta, 1988. ISBN 979-407-080-7