Madame Tussauds

Saka Wikipédia Jawa, bauwarna mardika basa Jawa
Madame Tussauds

Madame Tussauds inggih punika sawijining musiyum lilin paling misuwur wonten ing London, Inggris, kanthi cabang-cabang ing sapérangan kutha ageng wonten ing donya. Museum punika kapisanan dipundirikaken déning pematung Marie Tussaud.

Sajarah[besut | besut sumber]

Marie Tussaud (miyos 1761, séda 1850), miyos minangka Marie Grosholtz ing Strasbourg, Perancis. Ibunipun nyambut damel minangka pembantu rumah tangga kanggé Dr. Phillippe Curtius, satunggaling dhokter ingkang ahli wonten ing babagan damel patung lilin. Curtius ndidik Tussaud wonten ing seni patung lilin. Nalika taun 1765, Curtius damel patung lilin Marie-Jeanne du Barry, selir saking Raja Louis XV saking Perancis. Cetakan saking patung mau inggih punika benda paling sepuh ingkang taksih wonten saking sajarah musiyum patung lilin punika.[1]

Paméran ingkang kapisanan saking karya lilin Curtius dipunadani wonten ing taun 1770 lan narik kawigatosan saking kathah tiyang. Paméran mau pindhah dhateng Palais Royal ing Paris wonten ing taun 1776. Curtius mbikak papan ingkang angka 2 kanggé karya-karyanipun punika wonten ing Boulevard du Temple wonten ing taun 1782 kanthi nama "Caverne des Frands Voleurs", asal muasal saking pérangan musèum ingkang dipunkenal sapunika minangka Chamber of Horrors (teges barès Kamar Horor).

Tussaud damel patung lilin ingkang kapisanan, inggih punika patung Francois Marie Arouet de Voltaire, utawi ingkang langkung asring dipunkenal kanthi nama Voltaire,wonten ing taun 1777. Tokoh-tokoh kondhang sanèsipun ingkang dipundamel patung tiruanipun, kados ta Jean Jacques Rousseau lan Benjamin Franklin. Sadanguning Revolusi Perancis piyambakipun damel panutup wajah mayit kanggé para tokoh ingkang dados kurban. Piyambakipun rila kanggé pados sirah-sirah para kurban ingkang pedhot ing tengah-tengah tumpukan mayit supados saged mungkasaken panutup rai mayit punika kanthi sampurna.

Nalika Curtius séda wonten ing taun 1794, piyambakipun nilaraken kolèksi patung-patung lilinipun dhateng Tussaud. Wonten ing taun 1802, Marie Tussaud pindhah dhateng London. Minangka konsekuènsi Perang Inggris-Perancis, piyambakipun boten saged wangsul dhateng Perancis saèèngga kanggé gesang piyambakipun kedah kliling Inggris lan Irlandia mamèrakan karya-karyanipun. Sawetawis wekdal karya-karyanipun punika naté dipunpaméraken wonten ing Lyceum Theatre. Piyambakipun lajeng saged gadhah papan paméran permanén kanggé karya-karyanipun wonten ing Baker Street, London, nalika taun 1835 (ing papan ingkang dipunsebut "Baker Street Bazaar").

Salah satunggaling atraksi utama musiyum Tussaud inggih punika "The Chamber of Horrors". Pérangan eksibisi nedahaken sapérangan kurban Revolusi Perancis lan ugi patung-patung para pembunuh lan penjahat sanèsipun. Nama ruangan puniaka kaparaingaken déning satunggaling tiyang wonten ing kalawarta Punch nalika taun 1845.

Tokoh-tokoh misuwur sanès lajeng wiwit katambahaken wonten ing ruwang paméran, kalebet ugi Horatio Nelson lan Sir Walter Scott. Sapérangan patung lilin ingkang dipundamel déning Tussaud piyambak taksih wonten dumugi dinten punika. Wonten ing taun 1842, piyambakipun damel patung lilin dhirinipun piyambak ingkang sapunika kapajeng ing lawang mlebet utama muséumnipun.

Museum Madame Tussaud pindhah dhateng alamatipun sapunika ing Marylebone Road nalika taun 1884. Nalika taun 1925 kebakaran ngrisak kathah saking patung-patung ingkang wonten, nanging cétakan-cétakanipun saged dipunslametaken saèngga patung-patung lilin bersejarah mau saged dipundamel malih.

Museum lilin Madame Tussaud sapunika sampun ngrembaka dados sawijining jujugan plesiran ing London, jèjèran kaliyan London Planetarium ing sisih kilénipun. Museum punika sampun gadhah cabang ingAmsterdam, Las Vegas, New York City, Hongkong,[2] Shanghai, Hollywood-Los Angeles, lan Washington D.C. Sakmenika, patung-patung lilin Madame Tussauds kasusun saking tokoh-tokoh sajarah, kulawarga kraton, bintang filem, atlet kondhang lan tokoh-tokoh kriminal ingkang kondhang. Museum Madame Tussauds sapunika sampun dados kagunganipun sawijining parusahan wisata ingkang nama Merlin Entertainments sasampuning ngakuisisi Tussauds Group nalika wulan Mèi 2007.

Cathetan suku[besut | besut sumber]

  1. http://www.madametussauds.com/
  2. "Archive copy". Diarsip saka sing asli ing 2004-01-14. Dibukak ing 2013-03-24.{{cite web}}: CS1 maint: archived copy as title (link)