Kumbakinumba

Saka Wikipédia Jawa, bauwarna mardika basa Jawa

Raden Kumbakinumba (Ditya Kumba) iku putrane Raden Kumbakarna lan Dewi Kiswani. Duwe kadang tuwa tunggal rama ibu, asmane Raden Aswanikumba. Tokoh iki mung tinemu ing wayang Ramayana, lan metune nalika dumadi perang Ngalengka.

Kacarita sapatine putra 7 (Bukbis Mukasura, Trisirah, Trikaya, Narantaka, Dewantaka, Trinétra, lan Triweneh), Prabu Dasamuka sungkawa banget penggalihe. Nganti sawetara suwene jumeneng ana ing gapuraning pura tanpa ngandika. Dumadakan katungka sowane Raden Aswanikumba lan Raden Kumbakinumba.

"Wa Prabu, kula tingali sajak sungkawa penggalihipun. Menapa ta ingkang anjalari sungkawaning penggalih?" pitakone Raden Aswanikumba.

"Lantip panggraitamu, ngger Aswanikumba. Ri kalenggahan iki, aku kelangan putra 7 sing gagah-gagah, lan digdaya kabeh. Padha gugur ing paprangan mungsuh kethek-kethek balane Ramawijaya, " ngendikane Prabu Dasamuka.

"Wa Prabu sampun ngantos kagungan penggalih was sumelang. Taksih wonten kula lan adhi kula Kumbakinumba. Kula badhe rumeksa kasugengan paduka kanthi setya saha tulusing manah. Sagah labet jiwa raga dhateng paduka. Boten badhe ngucira ing yuda lumawan mengsah. Kakarsakna mangsah yuda sawanci-wanci, sendika. Milanipun sampun ngantos Wa Prabu ngelantur penggalih sungkawa, " ature Raden Aswanikumba.

"Bagus. Banjur apa piyandelmu kanggo ngadhepi Rama sabalane?" pandangune Prabu Dasamuka.

"Kula lan rayi kula menika boten saged pejah. Upami kula pejah ing paprangan, dipun langkahi rayi kula, kula saged gesang malih. Semanten ugi kosokwangsulipun. Yayi Kumbakinumba pejah, kula langkahi saged gesang malih. Mila kula cumadhong dhawuh. Kula nedya ngetingalaken dharma bekti dhumateng paduka."

"Aja kesuwen, gage majua ing paprangan. Sirnakna Rama sawadyabalane. Yen kowe bisa menang perangmu, gedhe ganjaran kang bakal dakparingake marang kowe sakloron, " dhawuhe Prabu Dasamuka.

Sawise nyembah, Raden Aswanikumba lan Raden Kumbakinumba sigra manjing ing pabaratan. Kekarone pancen digdaya tenan. Angger siji mati, dilangkahi sijine, urip maneh. Wanara pirang-pirang kang ngrubut, padha mati ketaman gadane.

Anoman sigra sowan Raden Wibisana. Nyuwun pamrayoga supaya bisa nyirnakake Aswanikumba lan Kumbakinumba. Dingendikani yen kekarone kudu mati bareng. Anoman matak aji Mundri, nuli mangsah yuda maneh. Aswanikumba lan Kumbakinumba dicandhak gulune, banjur diedu mustakané. Kekarone sirna margalayu. Wiwit iku, perang mungsuhe diedu sirahe banjur diarani diedu kumba.