Kothak wayang

Kothak wayang iku wadhah kanggo nyimpen wayang. Digawé saka kayu, kadhang diukir dadi katon artistik. Kothak wayang kang apik adaté digawé saka kayu surèn, dudu kayu jati. Bahan kanggo gawé kothak iki saka kayu surèn jalaran kayu surèn iku ora ngandhut lenga, kang bisa gawé rikat rusaké wayang. Yèn kothak wayang digawé saka kayu jati, adaté wayang rikat rusak utawa gampang luntur pradané, amarga kayu jati iku ngandhut lenga kang akèh.

Saliyané kanggo nyimpen wayang kira-kira cacah 200 iji, kothak uga kanggo perangkat pagelaran liyané antarané kelir, cempala, lan kepyak. Ing sajeroning kothak uga ana kang karan èblèk. Èblèk iku digawé saka nam-naman pring sing ukurané luwih cilik saka kothak. Èblèk racaké dibungkus nganggo kain sing warnané abang utawa ireng. Gunané èblèk iki ora liya kanggo matesi tumpukan wayang siji lan sijiné.

Ukuran

Lumrahé ukuran dhimènsi kothak dawané kira-kira 150 cm, ambané 80 cm, lan dhuwuré 60 cm.