Kembang mentéga

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian
Kembang mentèga jambon

Kembang mentéga (Nerium oleander Linn.) ya iku tetuwuhan perdu kang kalebu kulawarga Aponynaceae. Dhuwuré kembang iki 2-5 mèter. Godhongé awujud garis lansét kanthi dawa 7-20 cm lan ambané 1-3 cm. Godhong sing ndhuwur wernané ijo enom lan godhong sing ngisor wernané ijo tuwa lan rada kandel. Kembang mentéga wernané jambon nanging ana uga sing putih. Kembang majemuk kang wujudé kaya déné payung duwé benang sari warna kuning. Dhasaring makutha werna wungu kanthi dhiamèter 3-4 cm lan dawané 5 cm. Kembang mentéga ngasilaké woh polong kang akeh wijiné. Wiji iki atos tur kaku wernané ijo tuwa.[1]

Ékologi[besut | besut sumber]

Kembang mentèga abang

Tetuwuhan iki asalé saka tlatah Ëropah Kidul bajur dibudhidhayakaké ing Amérika mliginé ing California. Ing Indonésia, kembang iki didadékaké tanduran hias ing pekarangan omah. Oleander kalebu wit kang seneng sunaring srengéngé kanggo tuwuh lan prodhuksi kembang kang akéh. Oleander luwih gampang  ditandur mawa stèk galih ketimbang nganggo wiji. Kembang mentéga ora gampang kena gulma utawa lelara tanduran.

Kandhutan kimia[besut | besut sumber]

Kembang mentèga putih

Kelopak Kembang mentéga ngandhut duwé senyawa polifenol, flafonoid, saponin kang bisa dimupangataké nambani lara épilepsi  lan lemah jantung. Cara ngonsumsi ya iku kaya déné teh, kanthi cara digaringaké banjur di cor banyu panas lan diombé. Ananging ana ing sajroning godhong lan cawang wit iki duwé kandhutan nerioside lan oleandroside kang bisa nyebabaké sirah mumet, lara weteng, ngantuk,  mencret, semaput, mengi lan bisa nyebabaké tilar donya. Kandutan liyané ya iku nerin, oleandrine, odoroside-a, adynerine, digitoxogenin.

Rujukan[besut | besut sumber]

  1. Widiyastuti, Yuli (2009). Mengenal Tumbuhan Berbahaya di Sekitar Kita. Tawangmangu Karanganyar: Balai Besar Penelitian dan Pengembangan Tanaman Obat dan Obat Tradisional. k. 48. ISBN 978-979-985722-4.