Judith Bosnak

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian
Judith Bosnak (ing madya)

Dr. Judith Ernestine Bosnak (miyos ing Velp, Rheden, Gelderland, Walandi, 29 Januari 1973) punika satunggiling nimpuna budaya Jawi. Piyambakipun spésialisi ing babagan téater utawi sandhiwara Jawi. Karya ngèlmiahipun ingkang langkung wigati, punika dhisèrtasinipun ingkang ajudul Shaping the Javanese play. Dhisèrtasi punika dipunajokaken ing sidhang promosi ingkang kalaksanan ing 2006.

Babad slira[besut | besut sumber]

Judith Bosnak miyos ing Velp, inggih punika satunggiling kitha alit utawi mbokmenawi saged dipunwastani dhusun ing sawétanipun nagari Walandi. Piyambakipun mlebet sekolah menengah inggil ing Vrije School de Berkel ing Zutphen antawis taun 1986 kaliyan 1992.

Sasampunipun lulus lajeng Judith miwiti studi ing Univèrsitas Leiden ing taun 1993. Piyambakipun kuliah ing jurusan Talen en Culturen van Zuidoost-Azië en Oceanië (Basa lan Budaya Asia Kidul-Wétan lan Oseania).

Lajeng ing tengahipun taun 1995, Judith mendhet kursus basa Jawi ing Universitas Sebelas Maret (UNS), Surakarta.

Ing taun salajengipun, ing taun akadhémi 1996-1997, Judith kuliah ing Universitas Gadjah Mada, Bulaksumur, Ngayogyakarta. Piyambakipun mendhet basa Indonesia, basa Jawi, kaliyan ngèlmu antropologi.

Sawangsulipun ing Walandi, Judith nglajengaken kuliahipun kaliyan saged ngrampungaken studinipun ing Agustus 1998 kaliyan angsal gelar magister. Topikipun punika bab Srimulat, satunggiling kelompok komédhi saking Sala. Skripsinipun saged dipungolongaken inovatif kanggé jaman samanten amargi ingkang dados bahan panelitèn punika matérial audio-visual.

Sasampunipun lulus Judith lajeng katampi dados mahasiswi peneliti S3 ing Research School for Asian, African and Amerindian Studies ("Sekolah Riset Studi-Studi Asia, Afrika, saha Indian-Amérika"). Piyambakipun lajeng nglampahi panelitèn lapangan ing Ngayogyakarta ing taun 1999, 2000 saha 2001.

Sabèntenipun mahasiswi peneliti Judith ugi dados satunggiling dhosèn wonten jurusan sastra lan budaya Jawi ing Universitas Leiden. Amargi kagolong pracéka saha pinter piyambakipun asistèn ugi kerep nggentos professor Ben Arps manawi saweg boten wonten ing lokasi.

Ing pungkasaning taun 2006, Judith Bosnak majeng ing sidhang promosi lan saged angsal gelar “dhoktor”. Dhisèrtasinipun asesirah Shaping the Javanese play. Karyanipun punika bab skrip lakonan sandhiwara Jawi. Buku puniki asil saking panelitèn lapangan ingkang sampun dipunlampahi saking taun 1999 dumugi taun 2001. Isinipun sangang studi kasus sandhiwara Jawi.

Pratélan pustaka[besut | besut sumber]