Fort Rotterdam

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian

Fort Rotterdam utawi Benteng Ujung Pandang (Jum Pandang) punika satunggaling bètèng tilaran saking Karajan Gowwa-Tallo. Bèntèng punika mapan wonten ing pinggiring pasisir sisih kulon kutha Makassar, Sulawesi Selatan [1].

Bèntèng punika tilaran saking Kesultanan Gowa. Kesultanan punika naté jaya sakiwa-tengené abad kaping 17 kanthi kutha krajan Makassar. Sejatosipun, kasultanan punika gadhah 17 bètèng ingkang muteri kutha krajan. Nanging namung Fort Rotterdam ingkang paling megah lan keaslianipun taksih kejagi [2].

Fort Rotterdam punika dipunyasa nalika taun 1545 déning Raja Gowa kaping X anama Imanrigau Daeng Karaeng Lakiung utawi Karaeng Tunipalangga Ulaweng. Ing wiwitanipun, wujuding bètèng punika segi papat kados arsitèktur gaya Portugis, bahan dhasaripun saking campuran watu lan lemah ingkang dibakar dumugi garing [2].

Ing tanggal 9 Agustus 1634, Sultan Gowa kaping VIV (I Mangerangi Daeng Manrabbia kanthi gelar SUltan Alauddin) ndamel témbok kanthi bahan watu padas ireng saking laladan Maros. Nalika 23 Juni 1635, dipunyasa malih témbok kaping pindho celak pintu gerbang. Bèntèng punika naté rusak nalika penjajahan Walanda. Walanda naté nyerang Kasultanan Gowa ingkang kala punika dipunpimpin déning Sultan Hasanuddin ing taun 1655-1669. Ancasipun Walanda nyerang punika kanggé nguasani jalur perdagangan bumbon crakèn lajeng miyaraken sayap kakuasaan kanggé ngampilaken mbikak jalur dhateng Banda lan Maluku. Armada Perang Walanda punika dipunpimpin déning Jendral Admiral Cornelis Janszoon Speelman. Kirang langkung satunggal taun Kasultanan Gowa dipunserang, amargi serangan punika sapérangan bètèng risak.Amargi Sultan Gowa kalah banjur dipunpeksa tandatangan Perjanjian Bongaya ing tanggal 18 November 1667. Awit saking punika Fort Rotterdam punika ginanipun kanggé pusat dagang lan penimbunan asil bumi kados bumbon crakèn saha pusat pamaréntahan Walanda ing Indonésia [2].

Arsitèktur[besut | besut sumber]

Tembok bètèng punika dhuwuripun 5 mèter kanthi kandel kirang langkung 2 mèter kanthi lawang utama ingkang alit. Manawi mirsani bètèng punika saking nginggil awujud segi gangsal kados penyu ingkang badhé mlebet dhateng pasisir. Amargi bètèng punika mirib kaliyan penyu, wonten ugi ingkang mastani Bèntèng punika dados Bèntèng Panynyua (penyu). For Rotterdam gadhah 5 bastion inggih punika yasan ingkang langkung kokoh lan langkung inggil ing saben pojok bètèng ingkang padatanipun dipunpasangi kanon utawi meriam [2].

Wisata Sajarah[besut | besut sumber]

Salah satunggaling objek wisata ingkang kawéntar ing mriki kejawi bètèng Fort Rotterdam punika ruang tahanan sempit ingkang naté kanggé papanipun Pangeran Diponegoro nalika diguwang déning Walanda nalika ketangkep ing Jawa. Perang Diponegoro ingkang kalampahan naila 1825-1830 kapungkasan kanthi Pangeran Diponegoro kajebak déning Walanda nalika ndhèrèk perundingan damai. Pangeran Diponegoro banjur kecekel banjur diguwang dhateng Manado, lajeng ing taun 1834 dipunpindhah dhateng Bèntèng Rort Fotterdam.

Cathetan suku[besut | besut sumber]

  1. [1], (id) Benteng Fort Rotterdam (dipun-akses tanggal 24 Dhésèmber 2012).
  2. a b c d [2], (id) Wisata Makassar (dipun-akses tanggal 24 Dhésèmber 2012).