Eyjafjallajökull

Saka Wikipédia Jawa, bauwarna bébas abasa Jawa

~

Eyjafjallajökull, Islandia
Érupsi ing tanggal 27 Maret 2010

Eyjafjallajökull (diucapaké minangka [ˈɛɪjaˌfjatlaˌjœkʏtl̥], lan tegesé "pulo glètser gunung") iku salah siji saka glètser Islandia sing luwih cilik. Glètser iki dunungé ana saloring Skógar lan sakuloné glètser Mýrdalsjökull sing luwih gedhé.

Pucuk ès glètser iki nutupi sawijining gunung geni (dhuwuré 1.666 mèter) sing wis kerep njeblug sawisé Jaman Ès lan sakala-kala nggawa rhyolite menyang ndhuwur. Gunung geni iki naté njeblug ping pindho ing taun 2010, ya iku ing tanggal 20 Maret lan 15 April. Jeblugan ing sasi April iki njalari lalu lintas udara sadhuwuring Éropah Lor dadi amburadul lan kudu dipenggak. Miturut para nimpuna, jeblugan iki nganti 10 utawa 20 luwih gedhé tinimbang ing sasi Maret. Jeblugan sadurungé ya kadadéan ing taun 1821 nganti 1823. Banjur jeblugan sadurungé ana ing taun 1612. Kawah gunung geni iki diamèteré kurang luwih 3 – 4 kilomèter lan glètser iki nutupi tlatah sing ambané kurang luwih 100 km pasagi.

Pucuk kidul gunung iki sadurungé ya pasisir Atlantik pulo iki. Déné segara wis mundhur 5 kilomèter lan manten pasisir iki saiki awujud tebing-tebing dhuwur mawa grojogan banyu sing éndhah-éndhah rupané, sing misuwur dhéwé ya iku Skógafoss. Manawa ana angin kenceng, banyu grujugan sing cilik kadhangkala bisa kasebul tekan dhuwuring gunung.

Uga delengen[besut | besut sumber]