Darmin

Darmin (73) lair ing Banyumas 19 Juli 1945, ya iku pènsiunan guru kang manggon ana ing Désa Kalisalak, Kacamatan Kebasen, Kabupatén Banyumas, Jawa Tengah. Darmin kang miwiti urip bebrayan masarakat kanggo ngurangi angka pati ibu lan bayi ing désané. Sanadyan ta akeh wong sing ora seneng, dhèwèké ora preduli. Kabèh mau dilakoni supaya ora ana wong meteng kang mati nalika nglairaké. Ora kabèh uwong duweni pamikiran kaya Darmin, lan ora kabèh uwong gelem dadi kaya Darmin. Darmin pantes dadi panutaning wong akèh. Dhèwèké kang duwèni sipat ora gampang mutung lan tetep ngupaya supaya kabèh kekarepané isa kawujud. Kekarepané ora mung mentingaké awaké dhéwé ananging uga mentingaké kabèh wanita ing desané, mliginé wanita kang lagi meteng lan wanita sing arep nglairaké.

Kauripan

Ing Forum Kesehatan Ibu lan Anak (FKIA) kang diwiwiti taun 2012 , Darmin ngajak saben omah supaya urunan Rp.1.000,00 saben sesasi pisan kanggo disumbangaké marang ibu kang arep lairan ing désané. Wujudé ora mung urunan, nanging uga infak. Mula ana sing mènèhi Rp 5.000,00 utawa Rp. 10.000,00. Wiwitané Darmin rada ora precaya yèn kagiyatané mau bakal lumaku, amarga ana warga kang ora seneng. Ananging dhèwèké ora preduli karo omongané uwong liya lan dhèwèké tetep nglakoni kagiyatan kasebut kanthi sabar lan ikhlas. Ing telung sasi awitan dhuwit asil saka urunan utawa infak saka warga désané udakara ana 9 yuta. Ing wulan September 2018 iki dhuwité wis ana nganti Rp 456.450.000,00 Saka jumlah kuwi, Rp 351.175.000,00 wis digunakaké kanggo ngéwangi  809 ibu kang lairan. Bantuwané ora gedhé, udakara Rp.150.000,00 kanggo ibu kang nglairaké nèng puskesmas lan Rp. 300.000,00 kanggo ibu kang nglairaké nèng griya sakit.

Ora mung ngumpulaké infak, Darmin lan 27 motivator FKIA yaiku petugas posyandu ing 13 RW uga lagi ngupaya supaya para wanita kang lagi meteng mriksakaké kandhungané  ing  Puskesmas, njaga mangan, uga njaga karesikan lingkungan omahé. Saben ana wong kang lagi meteng, tim mesthi mara ing omahé lan mènèhi stiker ing ngarep omahé. Tegesé, supaya para kulawarga lan tanggané  padha siyaga. Wiwitané akèh warga sing ora preduli, mula kuwi banjur Darmin lan petugas FKIA asring mènèhi kawruh babagan ibu kang arepnglairaké kuwi prelu kawigatosan mligi lan ora bisa disepèlèkaké. Pungkasané saya suwé para warga saiki dadi luwih preduli lan kepengin nyuda angka pati ibu lan bayi.

Ora mung urunan utawa ngumpulaké infak, Darmin uga gawé acara donor darah ing désané lan ngajak para warga kang duwèni mobil supaya lila lan gelém mobilé digunakaké kanggo ngeteraké ing puskesmas utawa griya sakit yèn ana ibu kang arep lairan. Wiwitané mung ana 13 mobil sing wis siyaga ing 13 RW, nanging saiki wis ana 97 mobil kang didadekaké ambulan désa kanggo nulungi wanita arep lairan. Anane mobil lan sopiré penting banget amarga saka Désa Kalisalak mara ing puskesmas Kebasen jaraké 4 km. Menawa kahanané ibu lagi gawat, kudu digawa nèng griya sakit ing Notog, Banyumas kang jaraké 10 km.

Motivasi

Nglairaké yaiku perjuangan antarané urip lan mati kanggo ibu. Mula kudu bener-bener dijaga kasarasané lan kudu dijaga pola uripé saben dina supaya ibu lan bayiné sehat lan ora kena penyakit apa-apa. Kang ndadikaké supaya Darmin dadi motivator kaséhatan ing désané  yaiku amarga ing taun 1998 Saminah utawa adhine Darmin séda nalika nglairaké. Saminah nglairaké anaké sing ka-4 ditulungi karo dhukun bayi, bayiné urip ananging Saminah ora selamet, ari-ariné bayi ora isa metu lan Saminah langsung digawa menyang Griya Sakit ing Purwokerto. Mula saka pengalaman adhiné kuwi Darmin kepéngin yèn angka pati ibu lan bayi ing désané isa suda.

Upayané Darmin lan para motivator kaséhatan bisa ngurangi angka pati ibu lan bayi kasil. Wiwit taun 2013, wis ora ana kasus ibu kang ora ketulung nyawane nalika lairan ing Desa Kalisalak. Nanging, isih ana waé bayi kang ora ketulung, ning ora akèh lan luwih sithik tinimbang taun-taun sadurungé. Iku mau dadi bukti yèn ngutamakaké kasarasan ibu kang lagi meteng iku penting banget. FKIA ing Desa Kalisalak patut dadi conto kanggo désa-désa liyane. Para warga ing désané Darmin wis ngerti yèn kasarasan kuwi bab kang wigati. Senajan ta Desa Kalisalak wis kasil ngentasaké angka pati ibu lan anak kang dhuwur, nanging ora ana kawigatosan saka Dinas Kesehatan Kabupatèn Banyumas.