Tamtama Abadi (Kakaisaran Persia)

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Tamtama Abadi (Kakaisaran Persia), dhékorasi ing Istana Darius ing Susa (510 SM).

Tamtama Abadi utawi Pasukan Abadi (saking basa Yunani: Ἀθάνατοι, Athanatoi, "abadi", saking ater-ater a ("boten") + thanatos ("séda"); kadhangkala dipunsebat "Tamtama Abadi Persia" utawi "Sedasa èwu tamtama abadi") inggih menika nama ingkang dipunparingaken déning Herodotos kanggé nyebat tamtama khusus saking Kakaisaran Persia Akhemeniyah.[1][2][3] Tamtama abadi nggadhahi tugas minangka Garda Imperial lan ugi minangka tamtama adu tempur. Minangka Garda Imperial, Tamtama Abadi nggadhahi tugas ngayomi kakaisaran menawi wonten serangan saking negari manca, bilih minangka tamtama tempur, Tamtama Abadi ndhèrèk pamaréntah nalika wonten misi panyerangan dhateng manca, salah satunggalipun nalika ekspansi Kakaisaran Persia lan ing Perang Yunani-Persia. Nalika wekdal taskih damé, Tamtama Abadi nggadhahi tugas minangka pengawal kaisar. Nama ptamtama menika ing basa Persia kamungkinan inggih menika Anûšiya ('kanca'). Herodotos nggambaraken Tamtama Abadi minangka infantri ingkang dipunpandhégani déning Hydarnes. Tamtama menika cacahipun wonten 10.000 tamtama. Ingkang dipunkearengaken mlebet dados Tamtama Abadi inggih menika namung Persia, Medes, lan Elam. Tamtama Abadi pikantuk pelatian ingkang langkung saé lan abot tinimbang infantri ingkang biasa kemawon. Sedaya tamtama ing Tamtama Abadi sampun dipunlatih kanthi temen awit alitipun. Siasat ingkang dipunginakaken déning Tamtama Abadi inggih menika barisan ngajeng nyerang mengsah lan barisan ingkang wingking nembakaken panah dhateng mengsah. Para tamtama ingkang dadaos Tamtama Abadi inggih menika priyantun jaler ingkang setya tuhu dhateng kaisar lan badhé ngayomi kaisar, sanajan ngantos séda. Tamtama menika dipunsebat minangka "Tamtama Abadi" namung déning Herodotos. Sumber saking Persia piyambak boten nyebataken nama tamtama menika.[4] Kadosipun, Herodotus sampun kléru anggenipun nyebat Anûšiya ('kanca') kaliyan Anauša ('Tamtama Abadi').[4]

Sasanésipun Herodotos, Tamtama Abadi ugi dipunsebataken déning Athenaios[5] (ingkang ngutip Herakleides saking Kyme); Hesykhios[6] (ingkang kliru anggénipun nyebat tamtama abadi minangka detasemen kavaleri); Procopius[7]; sarta sumber-sumber sanés ingkang mendhet data saking Herodotos, Cassius[8] nyebat Tamtama Abadi kanthi mendhet rujukan saking Romawi, lan nyebataken kanthi nama Tamtama tempur.[9]

Nama[sunting | sunting sumber]

Miturut Herodotos lan Xenophon, tamtama menika dipunparingi nami Tamtama Abadi (Athanatoi) amargi cacahipun tansah tetep, inggih menika 10.000 tamtama. Tamtama Abadi gadhah tradisi utawi paugeran bilih menawi wonten Tamtama Abadi ingkang séda, tatu ingkang parah, utawi sakit, salajengipun dipungantos déning tamtama ènggal saéngga cacahipun tamtama menika tansah 10.000, boten kirang lan boten langkung,[10] amargi menika tamtama menika dipunsebat Tamtama Abadi[10][11] Miturut satunggalipun winasis saking Persia, Ardeshir Radpour, sasanésipun cacahipun ingkang tansah tetep, tamtama menika dipunparingi nama Tamtama Abadi ugi amargi tamtama menika boten naté nilar tamtama ingkang sampun séda ing médhan tetempuran. Tamtama Abadi tansah mindhahaken jisim tamtama Abadi ingkang séda lan nebihaken saking paningalipun mengsah, saéngga mengsah jarang ningal wonten tamtama anggota tamtama abadi ingkang séda. Menika ndadosaken prajurit Tamtama Abadi kados boten saged séda.[12] Nama sanés saking Tamtama Abdi inggih menika Melophoroi (Tamtama ingkang ngasta Apel). Nama menika dipunparingakeb déning sajarawan pandhèrèkipun Alexander Agung. Tamtama abadi ngasta tumbak ingkang nggadhahi panyeimbang arupi logam alit awujud bundheran kanggé ngimbangaken titik abot tumbak. Wujud pangimbang kasebat kados apel saéngga dipunsebat Para Pangasta Apel.[10][13][14]

Sajarah[sunting | sunting sumber]

Miturut Xenophon, Tamtama Abadi dipundamel dening Koresh ingkang Agung. Nalika wekdal kakuaosanipun Koresh, Kekaisaran Persia Akhemeniyah sukses nelukaken bangsa Assyria, bangsa Bablionia, bangsa Medes, bangsa Kurdi, bangsa Lydia, bangsa Parthia, bangsa Turki, bangsa Armenia, lan bangsa Ionia. Kakuaosanipun kasebar saking Lepen Indus ing India ngnatos dumugi Hellespontos ing Yunani. Amargi kakuaosanipun menika ingkang jembar, Koresh ngraos mbetahaken kaamanan kedah dipuninggilaken.[15]

   
Tamtama Abadi (Kakaisaran Persia)
Panjenenganipun menggalih dhumateng sinten panjenenganipun saged paring kapitadosan kaamanan istananipun........ Panjenenganipun milih sedasa ewu prajurit, ingkang damel kemah ing sakiwa tengenipun istana, njagi panjenenganipun siyang lan dalu, lan ndherek ngancani panjenenganipun menawi tindakan.
   
Tamtama Abadi (Kakaisaran Persia)

Xenophon, Kyrou Paideia.

Nalika wonten perang, Tamtama Abadi nggadhahi tugas kangge ngayomi tendha karajan ingkang dipundunungi dening kaisar.[16] Tamtama abadi ndherek perang wonten ing misi nelukaken Koresh ingkang Agung ing Kakaisaran Babilonia Enggal ing taun 547 SM, Kampanye Kambises mungsuh Mesir nalika taun 525 SM lan invasi Darius ingkang Agung dhateng Punjab Kilen lan Sindh ing India sarta Skithia nalika taun 520 SM lan 513 SM.[17] Wonten ing Paprangan Gaugamela nalika taun 331 SM, Tamtama Abadi njagi kaisar Darius III. Kadosipun Tamtama Abadi ugi ndherek sarta wonten ing Paprangan Gerbang Persia nalika taun 330 SM. Aleksander ingkang Agung kasil nelukaken Tamtama Abadi nalika Paprangan Issos nalika 333 SM. Sasampunipun kakaisaran Persia Akhemeniyah runtuh, Tamtama Abadi salajengipun dipunbibaraken.

Perang Yunani-Persia[sunting | sunting sumber]

Nalika Perang Yunani-Persia, Tamtama Abadi ndherek nyengkuyung Pangepungan Eretria lan Paprangan Marathon nalika taun 490 SM wonten ing invasi ingkang kapisan, sarta Paprangan Thermopylae nalika taun 480 SM lan Paprangan Plataia nalika 79 SM ing invasi ingkang kaping kalihipun.

Cathetan Suku[sunting | sunting sumber]

  1. ^ Herodotos, Historia 7.83.1
  2. ^ Herodotos, Historia 7.211.1
  3. ^ Herodotos, Historia 8.113.2
  4. ^ a b Lendering, Jona "Immortals, Greek name for an elite regiment in the ancient Achaemenid empire" Iran Chamber Society http://www.iranchamber.com/history/achaemenids/immortals.php. Retrieved 09-04-2011
  5. ^ Athenaios (q.v.), Deipnosophistai 12.514C
  6. ^ Hesykhios, Lexicon s.v.
  7. ^ Procopius (1.14.31)
  8. ^ Casius (52.27.1)
  9. ^ Schmitt, Rüdiger "Immortals" Encyclopaedia Iranica http://www.iranicaonline.org/articles/immortals. Retrieved 09-04-2011
  10. ^ a b c Xenophon. Kyrou Paideia 7.41.83
  11. ^ Trikeriotis, John "The Immortals" 300 Spartan Warriors http://www.300spartanwarriors.com/battleofthermopylae/theimmortals.html. Retrieved 10-09-2011
  12. ^ Deadliest Warrior, episode 17.
  13. ^ Athenaios, Deipnosophistai 12. 514B.
  14. ^ Lendering, Jona "'Immortals'" Livius http://www.livius.org/ia-in/immortals/immortals.html. Retrieved 09-04-2011
  15. ^ Xenophon, Kyrou Paideia
  16. ^ Arrianos, III, 3.1
  17. ^ "The Immortals- Ancient Persia’s Force of Elite Soldiers" The Ancient Standard http://ancientstandard.com/2011/01/21/the-immortals-ancient-persias-force-of-elite-soldiers/. Retrieved 8-8-2011

Artikel punika taksih tulisan rintisan (stub). Sinten kémawon ingkang kersa mbenakaken, sumangga kémawon.

Pranala Njawi[sunting | sunting sumber]