Biyoskup

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados

Biyoskup (Walanda: bioscoop saka basa Yunani βιος, bios (kang ateges urip) lan σκοπος (kang ateges "deleng") yaiku panggonan kanggo deleng pagelaran film kang nggunakaké layar lebar. Gambar film diproyèksikaké ing layar kanthi nggunakaké proyèktor. Gedhong biyoskup biasané komersial tegesé sing nonton kudu tuku karcis luwih dhisik. Filem sing diputer disorotaké nganggo proyèktor menyang layar jembar ing sangarepé para penonton. Ing jaman biyèn biyoskup muter filem sing wujudé isih arupa rol filem, nanging ing jaman modhèrn filem wis awujud digital.

Biyoskup ing Indonésia[sunting | sunting sumber]

Bioskop, Medan (ca. 1920)
Bioskop Menteng, Jakarta (ca. 1950-1960)
Bioskop Megaria, Jakarta (ca. 1960-80)

Biyoskup pisanan ing Indonésia diadegaké taun Desember 1900, ing Jl Tanah Abang I, Jakarta Pusat, karcis kelas I regané gulden (perak) lan rega karcis kelas 2 setengah perak.

Biyoskup jaman biyèn kawiwitan ing sekitar Lapangan Gambir (saiki Monas). Bangunan biyoskup nalika kuwi kaya bangsal kanthi gebyog saka gedhég lan payoé saka kemrakas/sèng. Sawisé rampung naggoné muter film, biyoskup mau banjur kagawa ngiteri kutha liyané. Biyoskup iki di kenal kanthi jeneng Talbot (jeneng saka pangusaha biyoskup mau). Biyoskup liya diusahakaké déning swijining wong kang jenengé Schwarz. Papan panggoné dumunung kira-kria ing Kebon Jahe, Tanah Abang. Sadurungé pungkasané remuk amarga kobong, biyoskup iki manggon ing sawijining gedhung ing Pasar Baru. Ana manèh biyoskup kang jenengé Jules Francois de Calonne (jeneng pangusahané) kang ana ing Deca Park. De Calonne iki mula-mula yaiku biyoskup terbuka ing lapangan, kang nalika jaman saiki sinebut "misbar", grimis bubar. De Calonne yaiku cikal bakal saka biyoskup Capitol kang ana ing Pintu Air.

Biyoskup-biyoskup liya ing antarané , Elite ing Pintu Air, Rex ing Kramat Bunder, Cinema ing Krekot, Astoria ing Pintu Air, Centraal ing Jatinegara, Rialto ing Senen lan Tanah Abang, Surya ing Tanah Abang, Thalia ing Hayam Wuruk, Olimo, Orion ing Glodok, Al Hambra ing Sawah Besar, Oost Java ing Jl. Veteran, Rembrant ing Pintu Air, Widjaja ing Jalan Tongkol/Pasar Ikan, Rivoli ing Kramat, lan liya-liyané minangka biyoskup kang muncul lan ramé ditekani sawisé periode 1940-an.

Film-film kang diputer ing biyoskup jaman biyèn yaiku film gagu alias bisu utawa tanpa swara. Biyasané pamuteran ing iringi musik orkès, kang nyatané jarang "nyambung" karo film. Sapérangan film kang nalika kuwi dadi favorit masarakat yaiku Fantomas, Zigomar, Tom MIx, Edi Polo, Charlie Caplin, Max Linder, Arsene Lupin, lsp.

Ing Jakarta nalika taun 1951 diresmèkaké bioskop Metropole kang nduwéni kapasitas 1.700 kursi, mawa teknologi véntilasi panyebul lan penyedhot, tingkat telu kanthi ruang dansa lan kolam nglangi ing lanté paling dhuwur. Taun 1955 biyoskup Indra ing Yogyakarta mulai ngembangaké kompleks biyoskupé kanthi toko lan restoran.

Ing Indonésia wiwit Orde Baru kaanggep minangka masa kang nawakaké majuning biyoskup, yaiku jumlah produksi film nasional utawa bentuk lan sarana papan pagelaran. Majuning biyoskup ana ing taun 1990-an. Ing dasawarsa kuwi produksi film nasional 112 judul. Déné wiwit taun 1987 biyoskup kanthi konsep sinepleks (gedhung bioskop kanthi luwih saka siji layar) sansaya akèh. Sinepleks-sinepleks iki biyasané ana ing kompleks toko, pusat blanjan, utawa mal kang tansah dadi panggonan dolanan bocah-bocah enom lan kiblat konsumsi masarakat kuthan saiki. Ing sekitar sinepleks cumawis pasar swalayan, restoran cepet saji, pusat dolanan, lan macem-macem.

Sinepleks ora mung sumrambah ing kutha gedhé, ananging uga nrobos kutha kecamatan minangka akibat saka kawicaksanan pameréntah kang ménéhi mangsa bebas pajak kanthi cara mbalèkaké pajeg tontonan marag "bioskop depan". Akibaté, ing taun 1990 biyoskup ing Indonésia ngalami kamenagang: 3.048 layar. Ssdurungé, ing taun 1987, ing sakubenging Indonésia ana 2.306 layar.

Era 2000-an[sunting | sunting sumber]

Ukadakara taun 2000an, jaringan biyoskup mulai ramé ing Indonésia. Ana 2 pangelola biyoskup kang misuwur, yaiku 21 Cineplex kanthi biyoskup 21, XXI, lan The Premiere sarta jaringan Blitzmegaplex. Biyoskup-biyoskup iki sumebar ing sakabèhing pusat blanjan ing Indonésia, kadang-kadang ing sawijining pusat blanjan ana luwih saka saji biyoskup. Film kang setèlaké yaiku film saka jero lan luar negeri, senajan ing wiwitan taun 2000 nganti udakara taun 2005, ora akèh perfilman nasional kang kasil mlebu jaringan biyoskup. Film-film nasional lagi mlebu biyoskup Indonésia kwit taun 2006 nganti sepréné.

Pranala jaba[sunting | sunting sumber]

Logo Wikimedia Commons
Pirsani galeri bab Biyoskup ing Wikimedia Commons.
Sumber artikel punika saking kaca situs web: "http://jv.wikipedia.org/w/index.php?title=Biyoskup&oldid=834134"